Nimin khan Indian Chamber of Commerce buatsaihin Mizoramin kan thei leh thlai tharchhuahte ram pawna kan hralhchhuah theih dan tur zirhona hun ‘Outreach Program on Agriculture Export from North East’ chu DIC Conference Hall, Lungleiah neih a ni. He hunah hian Indian Chamber of Commerce leh Agricultural and Processed Food Products Export Development Authority (APEDA) mithiamte bakah sawrkar official-te, entrepreneur-te leh zirlai thahnem tak an tel a ni. 

Pu Vishnu Saraswat, APEDA chuan kalkhawmte lawmna thu sawiin he programme-in a tum ber chu Mizo kuthnathawktute thei leh thlai thar te India ram state dangah te leh ram pawn thlenga thawn chhuah theih dan ngaihtuah tlan a ni, a ti a. APEDA chu India rama kuthnathawktute tharchhuah ram pawna hralhchhuah anih theihna tura din niin kum 1986 ah khan sawrkar laipuiin a din thu a sawi a. APEDA hian India ram hmun hrang hrangah office neiin inspection, training, packaging, marketing leh research te kalpuiin thlai, thei, sa chi hrang hrang, artui, dairy products, pickle, pangpar, khawizu, thei tui, bicuit leh bakery products leh thil dang chi hrang hrang export an buaipui thu a sawi a. Mizo kuthnathawktute leh Department-te pawhin APEDA hi hmang tangkai ve turin a chah a ni.

Nimin Outrech Programme- ah hian Indian Chamber of Commerce leh Agricultural and Processed Food Products Export Development Authority (APEDA) mithiamte bakah Pu R. Laltanzuala, Genral Manager, DIC Lunglei, Pu L.Lalhmingmawia Pachuaua, DHO, Pu Tlangtimawia Zote, DAO, Dr Lalmuanzovi, Senior Scientist KVK Hnahthial leh Dr Vanlalhruaia, AH&Vety ten zirtirna an pe a ni.