4750/2025-2026

Lunglei, 2026 Vau thla ni 9: Vawiin khan sawrkar laipui Ministry of Information & Broadcasting hnuaia Press Information Bureau (PIB) huaihawtin Lunglei Press Club-ah Viksit Bharat – Guarantee for Rozgar and Ajeevika Mission (Gramin) Act, 2025 leh National AIDS and STD Control Programme chungchang zir hona, "One-day media workshop — Varta" buatsaih a ni.

Lunglei District Bawrhsap Pi Navneet Mann chuan Khuallian niin he hun hi a hmanpui a. Ni za inhlawhna (MGNREGA) thlakna VB-G RAM G hnuaiah ni 125 inhlawhna siam a nih tawh dawn thu sawiin, thingtlang mite tana ei zawnna leh hmasawnna tam tak a thlen tur thu a sawi a. Mizoram chu India rama HIV/AIDS hluarna ber zinga mi a nih avangin National AIDS & STD Control Programme hnuaia hma lakna chu a pawimawh thu leh ṭhahnem ngai taka kalpui a ṭul thu a sawi a. Sawrkar ruahmanna hrang hrangte a chhawrtu tur mipuite'n an hriat theih nan media-te'n mawhphurhna pawimawh tak an nei tih sawiin, media mite chu inzir belh zel turin a chah a, media mite intuai thar nana PIB-in media workshop a buatsaih chu lawmawm a tih thu a sawi bawk.

He hunah hian Lunglei Sub-Headquarters YMA Vice President Pu CMS Dawngliana leh Mizoram Journalists' Association (Lunglei) District Vice President Pu F. Lalngaihzuala te chu Khual Zahawm an ni a. Pu CMS Dawngliana chuan scheme pawimawh tak tak puanzar leh inzirtir chu pawimawh a tih thu sawiin, YMA hma laknaa inzirtirna hrang hrang kalpui a nih ṭhin dan te a tar lang a. Pu F. Lalngaihzuala pawhin PIB-in media workshop an buatsaih chu hlu a tih thu sawiin, MJA Lunglei District tan press tour buatsaih turin a ngen.

PIB Aizawla Head of Office Dr Rajeev Lourembam chuan inlawmna thu sawiin, hun hman chhan a sawi fiah a. DRDO Lunglei ai awhte'n G RAM G Act, 2025 chungchang zirtirin, DISHA CPM Dr Zodinpuii Hrahsel chuan National AIDS & STD Control Programme chungchang a zirtir a. Zawhna leh chhanna leh sawi hona hun hman a ni bawk.