2526/2025-2026

Lunglei, 2025 Pawltlak thla ni 4: Nimin khan Labour, Employment, Skill Development & Entrepreneurship (LESDE) Department leh Lunglei District Skill Committee ṭang kawp huaihawtin Lunglei DC Conference Hall-ah Prime Minister’s National Apprenticeship Promotion Scheme (PM-NAPS) leh Apprenticeship Portal chungchang inzirtirna workshop buatsaih a ni.

He hun hi Lunglei District Additional Deputy Commissioner Pi Zoramdini chuan hmanpuiin, Apprenticeship pawimawhzia leh zirlai leh hna zawng mekte bakah, a ruaitu (employer)-te tan pawh thil ṭangkai tak a nih thu a sawi a. NAPS chuan ṭhalaite chu an hna zawnna, hna thawhna leh ei zawnna kawng hrang hrangah a chher hriam dawn a ni tiin, NAPS chungchang inzirtirna workshop buatsaih a ni chu lawmawm a tih thu a sawi a. Hna neitu (employer) establishment hrang hrang kal khawmte chungah lawm thu sawiin, scheme chhawr ṭangkaitu ni ngei turin a sawm nghal.

He hunah hian LESDE Department Deputy Director Pu Lalmuanawma chuan PM-NAPS chungchang a sawi fiah a. Support Team member Pu Henry Lalduhsaka chuan Apprenticeship Portal-a inziah luh dan leh a hman dan te a sawi fiah a. Zawhna leh chhanna leh sawi hona hun hman a ni bawk.