DIRECTORATE OF INFORMATION & PUBLIC RELATIONS, Government of Mizoram, India

477/2026-2027

Lunglei, 2026 Ṭomir thla ni 11: Vawiin chawhnu khan Power & Electricity Department huaihawtin Convention Centre, Lungleiah "Awareness Campaign on PM Surya Ghar: Muft Bijli Yojana" buatsaih a ni.

He hun hmanpuitu P&E Commissioner & Secretary Pi Lalrinzuali chuan Roof Top Solar, in chunga ni zung hmanga thahrui (power) siam chhuah chu sawrkar laipuiin a ngaih pawimawh thu sawiin, state sawrkar pawhin uar takin a kalpui chho mek tih a sawi a. Kawlphetha mamawhna a san zel avangin roof top solar chu uar deuh deuh a ṭhat thu sawiin, roof top solar hman chuan electric bill a tihtlem bakah, hman sen loh a khawl khawm theih thu te, in chung sa lutuk tur pawh solar panel-in a veng nia mi thiamte'n an sawi thu te a tar lang a. Mahni chhungkaw tan mai bakah ram tan power siamsakna a nih thu leh sawrkarin power mana a senso tam tak a humhim theih phahna tur a nih thu sawiin, thing leh mau chereu tur nasa taka venna a nih thu a sawi bawk a. Hemi kawnga hma lakna atan hian Mizoram sawrkar pawhin subsidy atan budget-ah sum a dah tih sawiin, subsidy tih theih lai chu hman ṭangkai tum ṭheuh turin mipuite a chah.

P&E Chief Engineer (SO) Er Laltlanthanga'n hun kaihruaiin, inlawmna thu a sawi a. P&E Superintending Engineer (Planning) Er Malsawmdawngliana chuan Roof Top Solar pawimawhna sawiin, kawlphetha mamawhna sang zel phuhru tur leh khawvel boruak lum zel tiziaawm tur te, boruak bawlhhlawh leh rimchhia siam chhuah titlem tur leh a kaihhnawih harsatna hrang hrang sut kian nana sawrkar laipui hma lakna a nih thu a sawi a. Mizoram pawhin Megawatt 7 Roof Top Solar kan nei tawh tih tar langin, ṭan lak deuh deuh a ṭul thu a sawi.

Lunglei Power Circle-a Superintending Engineer Er H. Lalnunsanga'n powerpoint presentation hmangin PM Surya Ghar chungchang a sawi fiah a. Zawhna leh chhanna leh sawi hona hun hman a ni bawk.

India sawrkar laipui chuan Rooftop Solar scheme hi Phase-I leh Phase-Il lo kalpui tawh ṭhinin, Phase-l leh Phase-Il-ah hian Mizoram pumah 1.9MWp lai, chenna in 431-ah bun a lo ni tawh a. PM Surya Ghar: Muft Bijli Yojana hi February ni 29, 2024 khan tlangzarh niin, he scheme hnuaiah hian mimal in (household) vaibelchhe khat (1 crore)-a Central Subsidy pek a, Rooftop Solar System (RTS) bun tum a ni a. Hei hi consumer-te'n electric hman man an chawi tlem emaw, chawi lova an awm theih nan leh India-in kum 2026–2027 ral hmaa Rooftop Solar hmanga power 30GW siam chhuah a tum tihhlawhtlin nana ruahman niin, he scheme kal tlang hian 1,000 Billion Unit energy siam chhuah a, kan chenna khawvel sik leh sa tihziaawm nana lei tuamtu boruaka carbon dioxide gas ton 720 million zet tihtlem leh hna thawh tur siam belh a, tualchhung ei leh bar dinhmun tihhmasawn te a tum a ni.

He Scheme hmangtute hian Central leh Mizoram State sawrkar aṭangin subsidy ṭha tawk tak an dawng ve ve dawn a. Rooftop Solar Plant-in power a siam chhuahte chu a neituin a man hran chawi ngai lova hmang nghal theiin, man chawi ngai grid power a hman tlem phah dawn a. Chenna ina vuah, RTS aṭanga energy siam chhuahte hi in neitute hman bak chu sawrkarin unit khat ₹4.73 zelin a lei letsak thei bawk.

Attachment