DIRECTORATE OF INFORMATION & PUBLIC RELATIONS, Government of Mizoram, India

476/2026-2027

Lunglei, 2026 Ṭomir thla ni 11: Vawiin khan Baptist Church of Mizoram (BCM) General Secretary Rev. Dr H. Lalthlamuana lehkhabu ziak, "Pastoral Care and Counselling to Organ Transplant Patients" chu Health & Family Welfare Minister Pi Lalrinpuii'n BCM Hall, Serkawn, Lungleiah a tlangzarh.

Lehkhabu tlangzarhtu Minister Pi Lalrinpuii chuan Mizote hi zirna ngaisang hnam kan nih rualin lehkhabu neih lamah kan hnam naupanna a langin, kan la pachhe deuh tih sawiin, ṭhangtharte'n an chhui bingna innghahna tur lehkhabu ro tling kan neih tam ṭul a tih thu leh chuti ang chi lehkhabu ro tling tlangzarh belh a ni leh ta chu lawmawm a tih thu a sawi a. Khawsak phung changkannain natna tam tak a ken tel thu leh Mizoramah pawh natna khirhkhan leh enkawlna ṭha ber mamawhna, taksa peng thlak (organ transplant) te pawh a langsarin a tam ta hle tih sawiin, tun dinhmunah Mizoram pumah organ transplant mi 243 chhinchhiah an nih thu leh MUHCS hnuaiah mi 19 organ transplant an nih tawh thu a tar lang a. Damlohnain damlote rilruah nasa taka nghawng a neih ṭhin avangin damlo enkawltu leh chhungte pawhin damlote rilru hriat thiampui a ṭul tih sawiin, taksa peng thlak tawh damlote mamawh leh rilru put dan hriat thiampui a, a enkawl theih dan tur chungchang lehkhabu ro tling tak ziaktu Rev. Dr H. Lalthlamuana chu chhuanawm a tih thu a sawi a. Damlo enkawltute, sakhaw rawngbawltute leh mipui mimirin an chhiar a, ṭangkai taka an hman a beisei thu a sawi.

Lehkhabu tlangzarh inkhawm hi BCM Associate GS (Service) Rev. Vanlalmuankima'n kaihruaiin, lehkhabu ziaktu Rev. Dr H. Lalthlamuana'n lehkhabu chungchang a sawi zau va. Serkawn bialtu pastor Rev. Dr JC Vanlalluaia'n ṭawngṭaiin hun a khar.

Vawiina tlangzarh tak "Pastoral Care and Counselling to Organ Transplant Patients" lehkhabu hi doctoral thesis niin, mite'n an ṭangkaipui beisei avanga a bua tihchhuah a ni a. Taksa peng thlak (organ transplant) hi ngaihzam mai chi a nih loh dan leh organ transplant tawhte chu hmangaih taka enkawl leh duat an ṭul zia te, kal nihphung leh hna thawh dan te, kal natna lo awm theih dan leh a chhiat zel loh nana inven dan kawng hrang hrang te, organ transplant chungchanga dan leh hrai awm te, organ transplant tawhte enkawl chungchanga sakhaw rawngbawltute tana hma lak dan tur te he lehkhabuah hian tar lan a ni.

Attachment