2323/2026-2027

Lunglei, 2026 Mimkut Thla ni 23: Vawiin khan District Programme Officer (DPO) Office, Women & Child Development Department, Lunglei huaihawtin DPO Conference Hall, Zotlang, Lungleiah "Project Genesis" hawnna hun hman a ni a. Pu Satish Kumar Tegta, IAS, Sub-Deputy Commissioner, Lunglei District chu Khuallian niin, Health & Family Welfare (H&FW) Department ai awhte, WCD hnuaia staff-te leh Anganwadi Worker-te an tel.

Pu Satish Kumar Tegta chuan Project Genesis kalpui a ni chu lawmawm a tih thu sawiin, him taka nuin damdawi in (health centre)-a nau a neih chu thil pawimawh tak a nih thu te, 1st Trimester ANC registration pawh nuin him taka nau a neih theih nana thil pawimawh tak a nih thu a sawi a. Project Genesis a hlawhtlin theihna tur chuan Anganwadi Worker-te, ASHA-te leh H&FW Department-a thawktute thawh hona ṭha neih a ṭul thu sawiin, sawrkar laipui hma laknaa Beti Bachao, Beti Padhao (BBBP) scheme kalpui mekah mipa aia hmeichhia nau piang an tlem zawk tihziaawm te, hmeichhe naupang ven him a, an dinhmun tihhmasawn leh an hriselna ngaih pawimawh kawngah nasa taka hma lak a nih thu a sawi a. WCD leh H&FW Department te ṭha taka thawk ho turin a chah.

Lunglei DPO (WCD) Pu R. Lalnunpuia chuan powerpoint presentation hmangin Project Genesis chungchang a sawi fiah a. Project Genesis hi kum 2025–2026 chhunga hma lakna tur project a nih thu leh Lunglei, Lawngtlai, Siaha leh Mamit District-ah kalpui a nih tur thu a sawi a. Women & Child Development hma lakna Project Genesis hlawhtlin theih nan hian WCD bakah, Health & Family Welfare Department leh Deputy Commissioner Office te an thawk ho dawn tih a sawi.

Project Genesis-in a tum ber chu nuin damdawi in/health centre-a nau a neih ngei theihna tur leh 1st trimester ANC registration-a hmasawnna tura beihpui thlak a ni a. Lunglei District chhung khaw 13-ah hma lak tum niin, target 166 tinzawn an ni a. Nu nau paiin hamṭhatna chi hrang hrang an neih dawn bakah, khaw dang aṭanga khawpuia nau nei tura kalte chu Shakti Sadan-ah an thleng thei dawn a ni.

Lungleia Project Genesis hawnnaah hian H&FW Department aṭangin Deputy Chief Medical Officer Dr Vanlalngheti leh official dangte an tel a. District Immunisation Officer Dr Christina Zonunmawii chuan nau pai chhinchhiah (ANC registration) leh damdawi ina nau neih (institutional delivery) pawimawhna zirtirin, Lunglei ICDS Project-a Child Development Project Officer Pi R. Lalhmingliani'n lawm thu sawiin hun a khar.