203/2025-2026

Lunglei, 2025 Ṭau thla ni 16: Vawiin khan Lunglei District Bawrhsap Pi Navneet Mann hovin a hna thawh pindanah Lunglei District-a vohbikte chawi kanna tur hma lakna - Project LEAP (Lunglei’s Empowerment for Access and Equity for all Persons) hnuaia April ni 22 aṭanga ni 26 chhunga Lunglei Civil Hospital-a vohbikte tana health assessment camp buatsaih tur atana inbuatsaihna thlir ho a ni.

Project LEAP hnuaiah hian Lunglei Municipal Council (LMC) huam chhungah leh Rural Development (RD) block hrang hrangah vohbikte tana hriselna dinhmun endikna (health assessment camp) hi buatsaih tura ruahman niin, a thawh khat nan LMC huam chhunga mite tan April ni 22 leh ni 26 inkar khian Lunglei Civil Hospital-ah health camp hi buatsaih turin ruahman a ni a. He hunah hian Disability Certificate/Unique Disability ID (UDID) card la nei lote tan ID a siam theih dawn bakah, vohbik 40% chung lam disability nei, UDID nei tawhte leh upa kum 60 chung lamte tan Artificial Limbs Manufacturing Corporation of India (ALIMCO) te chuan ṭanpuina hmanraw chi hrang hrang - wheelchair, bengdar, mitdel tiang, zakdawh tiang leh hmanraw dangte dawng thei tur assessment an buatsaih dawn bawk a ni.