202/2025-2026
Dated the 16th April, 2025: Mizoram Lokayukta hi Mizoram Lokayukta Act 2014 hnuaia din niin Dt. 11.3.2019 khan Chairperson hmasa ber Pu C. Lalsawta IAS (Rtd) hnuaiah dan angin Mizoram Lokayukta office hi hawn a ni a. Mizoram Lokayukta hi State sorkar lak atanga inrelbawlna leh hnathawh dan hrang nei a nih avangin eiruk leh hlemhletna do tura din (Independent anti-corruption body) a ni. Tun dinhmunah Mizoram Lokayukta ah hian Pu Lalmalsawma IAS (Rtd), Chairperson leh Member pahnih(2) awmin full body in hna a thawk mek a. Thawktu (staff) 28 awm mekin a tih changtlun zawk nan thawktu dang lak belh tura hmalak bakah hnuchhuitu hran (Inquiry Wing) pawh nei tura chak taka kalpui mek a ni.
Mizoram Lokayukta-ah hian a din tirh atangin thubuai 77 ziah luh niin chhui lailawk (Preliminary Enquiry) 55 (sawmnga leh panga) neih tawh a ni a. Heng complaint chhui lailawk (Preliminary Inquiry) atang hian chhui puitlin tawh (Investigation) 26 (sawmhnih paruk) a nei tawh a ni. Mizoram Lokayukta in thubuai thehluttute leh eiru nia puhna complaint a zir chianna (examination and hearing) atangin complaint 30 chu tih tawp ni tawhin, Department thuneitute hnenah Departmental proceeding ti tura thupek case 4 (pali) a awm tawh bawk.
Mizoram Lokayukta a eirukna thubuai thehluh (complaint) hi lehkha phek a ziakin Mizoram Lokayukta office ah pisa kai hunchhungin thehluh theih reng a ni a. Hemi bakah hian email hmangin mizoramlokayukta@gmail.com emaw mizoram.lokayukta@mizoram.gov.in ah complaint thehluh theih reng a ni bawk. Tunhnaiah hming awm lo leh thubuai thehluttute biak pawh theih loh complaint a awm thin a. Thu zawh belh ngai leh complaint kal zel dan hriattir turin complaint thubuai kalpui chhunzawm zel a harsa thin. Complaint ah hian thubuai thehluttu (Complainant)in a hming leh biak pawh theihna (contact number leh address) chiang takin a ziak thin tur a ni. Thubuai thehluttu (Complainant) in a hming leh nihna thup a duh a nih pawhin a hming leh nihna thupsak tlat tur a ni.
