DIRECTORATE OF INFORMATION & PUBLIC RELATIONS, Government of Mizoram, India

651/2025-2026

Lunglei, 2025 Ṭomir thla ni 29: May ni 27, 2025 (Thawhlehni) khan Lunglei District Bawrhsap Pi Navneet Mann hovin a hna thawh pindanah Lunglei District-a vohbikte chawi kanna tur hma lakna, Project LEAP (Lunglei’s Empowerment for Access and Equity for all Persons) hnuaia hma lakna kal mek leh hmachhawpte sawi ho a ni.

He ṭhut khawmah hian DC Office-a officer-te, BDO Lunglei, Civil Hospital Lunglei Sr Medical Superintendent, DSWO Lunglei leh DIPRO Lunglei te telin, Tlabung, Lungsen leh Bunghmun BDO-te'n biakhmuhtheihna kal tlangin an chhim bawk a. April ni 22 - 26, 2025 chhunga Civil Hospital Lungleia vohbikte hriselna dinhmun endikna (health assessment camp) buatsaih chu thlir let niin, he hunah hian vohbik leh upa kum 60 chung lam mi 737 te tan ALIMCO (Artificial Limbs Manufacturing Corporation of India) aṭangin ṭanpuina hmanrua (assistive device) chi hrang hrang dilsak an nih thu leh vohbikte zinga Unique Disability ID (UDID) card la nei lo mi 56 chu UDID card siam tharsak an nih thu tar lan a ni a. Vohbikte leh upate tana ṭanpuina hmanraw pek tur hi June thla tirah a lo thlen beisei niin, June thla chawlhkar thumnaah hmanrua leh UDID Card thar semna hun buatsaih tum ni se, tih a ni.

RD Block hmun hrang hrangah a tahtawlin health assessment camp buatsaih chhunzawm tura ruahman niin, he'ng health assessment camp-ah hian Project LEAP aṭangin vohbikte dinhmun endik te, UDID leh certificate dang (Aadhaar/Voter ID/tribal certificate, etc.) an mamawh siamsak leh ALIMCO aṭanga ṭanpuina hmanrua dilsak te bakah, Healthy Lunglei District Campaign nen kai kawpa natna inkai chhawn theih loh (non-communicable disease - NCD) endikna kalpui te rel a ni a. Ruahman lawk chinah, Tlabung (June 13), Lungsen (June 20), Lunglei Home TNT (June 26/27), Haulawng (July 4) leh Ṭawipui South (July 11)-ah te health assessment camp hi buatsaih tum a ni.

He ṭhut khawmah hian Mizoram PwD (Persons with Disabilities) Commissioner-in April ni 29, 2025-a Lunglei khawpui chhung vantlang hmun pawimawh - sawrkar pisa, damdawi in leh zirna inah te vohbikte tana veivah awlsamna ruahman dan a rawn endikna (access audit) aṭanga bawhzui ngaite bawhzui dan tur leh vohbikte hamṭhatna atana hma lakna tur hrang hrangte sawi ho a ni bawk.

Attachment