650/2025-2026

Khawzawl, dated 29th May 2025: Vawiin khan Zaingen YMA Hall-ah Vikshit Krishi Sankalp Abhiyan (VKSA) hawnna hun hman a ni a, Khawzawl Bawrhsap Pu K. Vanlalthiana'n khuallian niin a hawng a ni.

Khuallian Pu K. Vanlalthiana chuan department hrang hrang thawhrimna leh hnathawh that zarah he scheme pawimawh tak hi district-ah kalpui theih a ni dawn tih sawiin lawmthu a sawi a, Khawzawlah chuan thlai leh thei chi tin reng an ching tha a, loneitu te leh kuthnathawktu te'n thiamna sang zawk hmangin a tam zawk leh tha zawka an thar chhuah theih ngei a beisei thu a sawi bawk. Mipui te'n he scheme VKSA hi an hlawkpui ngei theih nan duhsakna sang ber hlanin a hawng a ni.

He hun hi KVK Khawzawl Senior Scientist & Head Dr. Malsawmkimi'n chairperson niin a kaihruai a, AH & Vety. Microbiology Senior Scientist Dr. Lalhruaipuii, DHO Pu Henry Lalremruata Varte, DAO Pi Lallawmzuali leh AH & Vety. Technical Officer Dr. Zomuana te'n thu an sawi bawk. He hunah hian kuthnathawk thahnem tak an lo kal bawk a ni.

VKSA hi Ministry of Agriculture & Farmers' Welfare leh Indian Council of Agricultural Research (ICAR) tangkawp hmalakna a ni a, sawrkar hotute'n loneitute leh kuthnathawk hrang hrang tlawh kualin an hmanrua leh inzirtirna an mamawh hrang hrang an pe chhuak dawn a ni.