4098/2025-2026

Lunglei, 2026 Pawlkut thla ni 22: Vawiin khan Lunglei District Bawrhsap Pi Navneet Mann hovin a hna thawh pindanah Lunglei District-a vohbikte chawi kanna tur hma lakna, Project LEAP (Lunglei’s Empowerment for Access and Equity for all Persons) hnuaia hma lakna kal mek leh hmachhawpte sawi ho a ni.

He ṭhut khawmah hian DC Office-a officer-te, Health & Family Welfare Department official-te, BDO-te leh I&PR official te an tel a. Nikum lama Project LEAP hnuaia hma lakna hrang hrang leh Lunglei District chhung bial (cluster) hrang hranga vohbikte hriselna dinhmun endikna (health assessment camp) buatsaih tawh dan te thlir ho niin, kum 2026 chhunga hma lak dan tur ruahmanna hrang hrang sawi ho a ni.

Health assessment camp hi Lungsen RD Block-ah February ni 12-ah, Tlabung RD Block-ah February ni 13-ah, Bunghmun RD Block-ah March chawlhkar khatnaah leh Lunglei RD Block-ah March chawlhkar tawp berah te buatsaih leh tum a ni a. He'ng health assessment camp-ah hian Project LEAP aṭangin vohbikte dinhmun endik te, UDID leh certificate dang (Aadhaar/Voter ID/tribal certificate, etc.) an mamawh siamsak leh ALIMCO aṭanga ṭanpuina hmanrua dilsak te bakah, Healthy Lunglei District Campaign nen kai kawpa natna inkai chhawn theih loh (non-communicable disease - NCD) leh natna dang endik te kalpui leh tum a ni.

Project LEAP hnuaiah hian nikum 2025 January - March inkar chhung khan vohbikte dinhmun zir chianna (disability survey) kalpui niin, vohbik 1,400 chuang chhinchhiah an ni a. Hmun hrang hrangah vohbikte hriselna dinhmun endikna (health assessment camp) buatsaih niin, vohbik mi 1,091 te'n an chhawr ṭangkai a; hemi kal tlang hian Unique Disability Identity (UDID) Card thar eng emaw zat siam a nih bakah, ṭanpuina hmanraw hrang hrang dilsak an ni a. June 2025 khan ALIMCO nen ṭang kawpin vohbikte ṭanpuina hmanraw chi hrang hrang cheng nuai 51 hu chu ni khat thil thu-ah mi 740 hnenah sem chhuah a ni a. Vohbikte awlsam taka vantlang hmun pawimawha an lawi luh theihna tur leh service hrang hrang an hman theihna tura ruahmanna a awm theih nan access audit buatsaih a ni bawk.

Project LEAP kal tlanga vohbikte tana remchanna leh awlsamna tura hma lakna, Accessible India Campaign (Sugamya Bharat Abhiyan) kalpuina kawnga a thawh ṭhat avang hian Lunglei District chuan December ni 3, 2025 khan "National Award 2025 for Most Outstanding District in Implementation of Accessible India Campaign" a dawng a ni.