DIRECTORATE OF INFORMATION & PUBLIC RELATIONS, Government of Mizoram, India

256/2025-2026

Lunglei, 2025 Ṭau thla ni 22: Lunglei District Administration hma laknaa Lunglei District-a vohbikte chawi kanna tur ruahmanna - Project LEAP (Lunglei’s Empowerment for Access and Equity for all Persons) hnuaia April ni 22 aṭanga ni 26, 2025 chhunga Lunglei Civil Hospital-a vohbikte tana health assessment camp buatsaih tur chu vawiin khan Civil Hospital Lungleiah District Bawrhsap Pi Navneet Mann chuan a hawng.

Vohbikte tana health assessment camp buatsaih hawnna inkhawm tawi buatsaihah Pi Navneet Mann chuan Project LEAP chu Lunglei District-a vohbikte'n sawrkar aṭanga hamṭhatna leh chanvo an chan tur ang an chan theihna tur leh an dinhmun chawi kan a nih theih nana an mamawh anga hma lakpuina tura ruahman a nih thu sawiin, he hma lakna peng khat atan hian Lunglei Municipal Council (LMC) huam chhungah leh District chhunga Rural Development (RD) block hrang hrangah vohbikte dinhmun zir chianna, persons with disabilities (PwD) survey neih tawh a nih thu a sawi a. He survey aṭang hian Lunglei District chhunga vohbik mi 1,262 awm zinga mi 443 chuan Disability Certificate/Unique Disability Identity (UDID) Card an nei tih hmuh chhuah a nih thu sawiin, Disability Certificate/UDID la nei lo mi 819 (64.90%) lai an la awm avangin health assessment camp chu ruahman a nih thu a sawi a. Vohbikte'n sawrkar ruahmanna hnuaia hamṭhatna hrang hrang dawng thei turin UDID an neih ngei a ṭul avangin health assessment camp kal tlang chuan UDID la nei lote UDID siamsak tum a nih thu sawiin, health camp chu District chhung block hrang hrangah pawh la buatsaih zel tum a nih thu a sawi a. District mipuite'n ṭangkai taka an hman a beisei thu a sawi.

He hun hi Civil Hospital Lungleia Senior Medical Superintendent Dr Laldinmawii chuan a kaihruai a. Lunglei District Social Welfare & Tribal Affairs Officer Pu CL Joseph pawhin thu sawiin, Additional Deputy Commissioner Pi Zoramdini'n lawm thu sawiin hun a khar a ni.

Project LEAP hnuaia vohbikte tana health assessment camp buatsaihah hian doctor specialist hrang hrangte'n vohbikte hriselna dinhmun hi enfiahin, an dinhmun leh harsatna azirin Disability Certificate/Unique Disability ID (UDID) siamsak an ni a, vohbik 40% chung lam disability nei, UDID nei tawhte leh upa kum 60 chung lamte tan Artificial Limbs Manufacturing Corporation of India (ALIMCO) te chuan ṭanpuina hmanraw chi hrang hrang - wheelchair, bengdar, mitdel tiang, zakdawh tiang leh hmanraw dangte dawng thei tur enfiahna (assessment) an buatsaih nghal bawk.

Tun ṭuma Civil Hospital Lungleia health assessment camp buatsaih hi LMC huam chhunga mite tana ruahman niin, April ni 26, 2025 thlengin ni tin zing dar 9:30 aṭanga tlai dar 1:30 thlengin vohbikte tan leh upa kum 60 chung lam, puihna hmanraw mamawhte tan pan theih a ni a. Pu Jacob Challiandinga (Clinical Psychologist) chu ni tin ṭhuin, Dr Jimmy Lalnunpuia (ENT) chu April ni 22 (Thawhlehni), ni 24 (Nilaini) leh ni 26 (Inrinni)-ah, Dr Laldinmawii (Eye) chu April ni 23 (Nilaini) leh ni 25 (Zirtawpni)-ah, Dr Joseph Lalrindika Chawngthu (Orthopedic) chu April ni 22 (Thawhlehni), ni 24 (Ningani) leh ni 25 (Zirtawpni)-ah te an ṭhu ang a. ALIMCO lamte hi ni tin an ṭhu tel bawk ang.

Attachment