No.22/2021-2022

Lunglei, 5th April, 2021: Vawiin chawhma khan District Local Administration Department, Lunglei buatsaihin Lunglei DC Conference Hall-ah Lunglei District chhunga tualchhung rorelna leh hmasawnna langtlang taka (Promotion of Transparency in Local Administration, Phase II 2021) thawk tha VC-te hnenah Pu Kulothungan A, Deputy Commissioner, Lunglei chuan Citation leh pawisa fai a hlan.

He hun hi Pu PC. Lalhmunliana, AFI (LAD) in kaihruaiin Pu Kulothungan A, chuan langtlang leh felfai taka hnathawh hian sawrkar a khalh ngil a, VC ten khawtlang kan enkawlnaah pawh eirukna a tihbo bakah khawtlang nena thawhhona tha zawk an neih phah thei a ni, a ti. Hetiang hmalakna hi Mizoram hmun hrang hrangah hman ni ve thei se a duh thu sawiin tualchhung rorelna langtlang taka kalpui a, corruption ven leh mipuiin VC-ah rinna an nghah zual theih nan, mipui hriatah VC hmalakna leh sum dinhmun tarlan tura buatsaih hi a tangkai hle dawn a ni, a ti. Lunglei DC chuan VC kalkhawmte chu dik tak leh felfai taka tualchhung rorelna kalpuia VC dangte entawntlak ni zel thei turin a chah bawk a ni.

Pu J. Miahlung, DLAO Lunglei in report pein Lunglei District chhunga VC te tan Promotion of Tranparency in Local Administration Phase I 2020 ah VC 5 thlan niin Phase II ah VC 10 thlan chhuah an ni a. He hmalaknain a tum ber chu VC leh mipui inkara thawhhona tha leh inrintawnna a lo awm theih nana hmalak niin hmasawnna hnathawh te langtlang taka kawng tin renga thawh leh hmuhtheiha awm theih nana tih a ni a ti. He initiative in a ken tel te chu thlakhatah vawikhat tal kokim taka VC thutkhawm neihin VC member zawng zawng hriatah sum hmuhna leh hman ralna tarlan te, thla khatah vawikhat tal Gram Sabha neiha, sum dihmun mipui hriata tarlan te, VC House-ah a duh apiang en theih tura sum din hmun tarlanga vengchhung chanchinbu kaltlanga VC thuthlukna leh sum dinhmun mipui hriata puanzar te, zawhfiah duh emaw sawisel duh nei tan biak pawhna tur complain channel/phone number tarlan te, VC hnathawh enpui turin NGO leh kohhran te sawm leh thlatin LAD office atanga internal audit neih te a ni a ti

Pu K.Lalrohlua, PD,DRDA Lunglei pawhin thu sawiin Sawrkar scheme hrang hrang sum hmannaah a thawktu ten thawk tha hle mahse mipui te kan hrilh hriat loh chuan inrinhlelna a awm thin a, chuvangin kan hnathawhna te, sum kan hman te, plan mumal tak langtlang takin mipui te hriatah puangzar thin a pawimawh thu sawiin hei hian veng chhung inrelbawlna leh hmasawnnaah rah tha a thlen dawn a ni, a ti.

Promotion of Transparency in Local Administration Phase II 2021-ah hian Lunglei District chhunga VC 10 thlan chhuah te telin, a ti tha lawmman la Veng te chu a hnuaia tarlan te hi an ni:

1st Prize - Bazar Veng leh Zotlang

2nd Prize – Venghlun

3rd Prize - Theiriat leh Zohnuai

Hemi bakah hian Sethlun VC, Mualthuam N VC leh he hmalaknaa LAD in a thawhpuite Lunglei Government College NNS-te hnenah Special Prize pek an ni.

Attachment

  • Loading attachment...