2061/2025-2026

Lunglei, 2025 Sahmulphah thla ni 3: Vawiin khan ramngaw (forest) humhalh chungchanga Lunglei District Level Committee (DLC) chu a ṭum 4 nan Additional Deputy Commissioner Pi Zoramdini hovin Lunglei DC Conference Hall-ah an ṭhu khawm.

He ṭhut khawmah hian Revenue, DLAO, Agriculture leh Lunglei Forest Department ai awhte bakah, Thlengang, Belkhai, Vaisam leh Mausen khua VCP-te leh YMA President-te an tel a. District Level Committee hi State Expert Committee rawtna anga sawrkarin a din a ni a. Supreme Court chuan Sawrkar Reserve Forest pawna ramngaw ṭhate mumal zawka humhalh a nih theih nan zir chiang a, report pe turin state tin a hriattir a; Lunglei District chhunga heti ang ram awmte zir chiang a, kum 1997-a State sawrkarin Affidavit hmanga Supreme Court-a a lo theh luh tawhho leh hmun danga ramngaw ṭha humhalh turte dinhmun report siam a, Expert Committee hnena theh lut leh turin District Level Committee hi din a ni.

DLC Member Secretary, Lunglei Divisional Forest Officer Pu Lalduhthlana chuan October ni 24, 2025-a State Expert Committee ṭhu khawm thu tlukna sawi fiahin, kum 1997 Affidavit-a ramngaw humhalh tur theh luh tawhte chu tihbo theih a nih tawh loh thu leh he'ngte hi VC, YMA leh Revenue Department te nen zir chian a, a zau zawng leh ramri te felfai taka report siam a ngaih thu a sawi.

Forest Department GIS Cell lam te be rawnin, a ṭul dan angin sawrkar department, VC leh YMA te nen ramngaw humhalh tur zir chianna hi kalpui ni se, State Expert Committee duh dan angin November ni 29, 2025 ral hmaa report theh lut hman turin hma lak ni se, tih a ni.