3230/2023-2024

LUNGLEI; the 5th, January' 2024: Vawiin khan Lunglei DC Conference Hall ah Pi Ramdinliani, IAS, Deputy Commissioner kaihhruaiin Lunglei a Republic Day 2024 hman dan tur rel a ni. Meeting ah hian Department hrang hrang hotute bakah NGOs leh kohhran hruaitute an tel a ni.

Meeting chuan kumin Republic Day chu C. Thuamluaia Mualah zing dar 10:00AM ah hman nise tiin a rel a. Khuallian atan Sorkar atanga ruat an awm loh chuan Lunglei Deputy Commissioner chu nise tih rel a ni. Chhun dar 12:00PM ah sawm bik te pualin DC Lawn ah VIP's at Home neih a ni bawk ang.

Republic Day lawmna tura Department hrang hrang mawhphurhna pek te hlen chhuak theuh turin ngen a ni. Republic Day lawmna hi mipuiin in lam atanga an lo en theih nan Cable TV kaltlanga Live Telecast pe chhuak turin JB Zonet leh LDF Cable TV te ngen nise tih rel a ni. Republic Day ah hian Sorkar, Zirna In leh Mimal In ah te hnam puan zar vek tura tih a ni bawk.

Kumin Republic Day lawmna ah hian Ceremonial Parade neih leh tur niin Armed, Unarmed, School Contingent leh Band Party te an tel dawn a ni.SP Lunglei kaihhruaina hnuaih Ceremonial Parade neih tur niin January ni 18 atanga ni 21 chhung Parade Practice neih tur niin January ni 24 ah Final Rehearsal neih a ni ang. Lunglei District chhunga faina kawnga titha lawmman chi hrang hrang sem a ni bawk ang.