3370/2023-2024

Lunglei; the 17th January, 2024: Vawiin khan Lunglei Municipal Area huam chhunga Higher Secondary School-a NSS Volunteers te Faina Hnatlang (Mass Cleanliness Drive) an thawk a. Vawiin Faina hnatlangpui hi DC Office leh UD&PA tangkawp ten an huaihawt a ni. Faina hnatlang hi ni hnih, vawiin leh 25/1/2024 hian thawh tur a ni a. Vawiinah hian Higher Secondary School 3: Govt. Higher Secondary School, Baptist Higher Secondary School leh Leitlang Higher Secondary School a NSS Volunteers 350 vel ten Thuamluaia Mual tihfai hna an thawk a ni.

Thuamluaia Mual an tihfai hma hian Faina Hnatlang kick-off programme tawite Old Tennis Court, Venglaiah hman phawt a ni a. He Kick-off programme hi Pu C.Sawihlira,DUDO in kaihruaiin, Pu K.Laltanpuia, CE,UD&PA in NSS volunteers te leh officials kalkhawm te chu FAINA THUTIAM a laktir a, NSS volunteers te hnenah district Bawrhsap Pi Ramdinliani chuan fuihna thuchah a sawi.

Pi Ramdini chuan National Service Scheme hi sorkar laipui Voluntary programme ropui tak a ni a, +2,College leh University Zirlai ten an zirlai an zir pahah khawtlang leh vantlang tana ke an penchhuah ve tur atan a duan a ni a. NSS Volunteers te hian thil chhenfakawm tak tak an lo titawh thin a ni. Vawiinah pawh kan Lunglei District chhunga NSS Volunteers ten Faina hnatlang thawk tura ke in lo penchhuak leh hi ropui ka tiin, lawmthu ka hrilh che u a ni. Lunglei khawpui hi khawpui fai inelna-ah lawmman tum hnih a lo la tawh a, hmanni lawkah pawh khan Khawpui ( mihring 50,000-1 lakh chenna) fai inelna Swachh Survekshan-2023 ah pawh lawmman kan dawng ve leh a nih kha. A concern department te chuan a huaihawt hna kan thawk hi a ni mai a, a thawktu dik tak chu mipui te in ni. Chuvangin Lawmman kan lak pawh hi nangmahni mipui te vang a la kan ni.Lawmman te kan la ve thei a, kan lawm viau laiin; Lunglei khawpui hian Faina kawngah tihtur hmabak erawh kan la ngah hle a ni, tih I hre thar leh theuh ang u. UD&PA in mipui puipunna hmunah bawlhhlawh bawm te a hung a, a then chu plastic bottles chauh paihna tur te a nih laiin, bawlhlawh chitin paih nan kan hmang leh mai thin. Aizawl khawpuiin bawlhhlawh tawih thei leh tawih theilo an thliar hran thei tawh laiin Lunglei khawpui chuan kan la thei ve lo. Hemi kawngah pawh hian tun atanga tan kan lak nasat a ngai, changkan kan duh chuan kan fai hmasak phawt a ngai. Kan Garbage bag leh bin te hi a hmanna tur dik tak anga kan hman ve theih hunah chuan changkanna kawng kan zawh tan ve tawh ang. Faina tluantling nei tur chuan Fai chauh a tawk lo, kan thianghlim tel tur a ni, ti a fuihna thuchah a sawi hnuah, faina hnatlang chu a kick off ta a ni.

Tahrik ni 25/01/2024 khian Lunglei Municipal Area chhunga College 4: Lunglei Govt.College, Govt.JB College, Polytechnic leh HATIM-a NSS Volunteers ten Lunglei khawpui hmun hrang hrangah chan insemin Faina hnatlang an thawk ve leh dawn a ni.