2828/2025-2026

Lunglei, 2026 Pawlkut thla ni 8: Vawiin khan Lunglei District Bawrhsap Pi Navneet Mann hovin Lunglei DC Conference Hall-ah Lungleia Republic Day 2026 hman dan tur rel a ni a. Sawrkar official-te, zirna in, pawl hrang hrang leh kohhran ai awhte an tel.

He hunah hian kum hmasa lama Lungleia ram ni pawimawh hman ṭhin dan tlangpui zul zuiin kum 2026 Republic Day hman dan tur ruahmanna siam niin, department leh pawl hrang hrangte kovah mawhphurhna hrang hrang nghah a ni.

Meeting chuan kum 2026 Republic Day lawmna chu C. Ṭhuamluaia Mualah January ni 26, 2026 (Thawhṭanni) zing dar 9:30-a hman tura relin, District Bawrhsap Pi Navneet Mann chu Khuallian atan beisei a ni a. Republic Day lawmna ceremonial parade buatsaih ṭha tih niin, ruahmanna siam turin SP leh DEO te kutah mawhphurhna dah a ni a. C. Ṭhuamluaia Muala hun hman zawh hnu chawhma dar 11:30-ah DC Bangla tualah VIP At Home hun buatsaih ni se, tih a ni bawk.

Lunglei District-a chhawmdawlna in, damdawi in leh District Jail-ah te Republic Day pual ṭanpuina thilpek pek leh ni se, tih a ni a. Kohhran leh tlawmngai pawlte hnenah Republic Day puala ṭawngṭai tur leh Republic Day lawmnaa tel tura ngenna thlen leh ṭha tih a ni a. Sports discipline ṭhenkhat aṭanga Republic Day 2026 puala inelna (tournament) buatsaih tura dilna lut chungchangah sum dinhmun azirin ruahmanna siam ni se, tih a ni bawk.

Republic Day ni-ah hian sawrkar office, zirna in leh sawrkar quarters-ah te India ram puanzar zar vek tura tih a ni a. Sawrkar hna thawkte chu Republic Day lawmnaah hian tel ngei tura beisei niin, mipuite pawh Republic Day lawmnaa tel vek turin Lunglei District Republic Day Celebration Committee chuan a sawm a ni.