339/2026-2027

Lunglei, 2026 Ṭau thla ni 30: Vawiin khan Mizoram District Transformation Programme, District Catalytic Fund (Handholding) hnuaiah Lunglei District Fisheries Development Office huaihawtin Government J. Buana College Multipurpose Hall-ah lui dung humhalh pawimawhzia inzirtirna, "Riverine Conservation Awareness Campaign" buatsaih a ni a. Lunglei RD Block huam chhunga Young Mizo Association (YMA) branch hrang hrang hruaitute, Village Council leh Local Council member-te, District Riverine Conservation Board member-te, Govt J. Buana College zirtirtu leh zirlaite leh Seventhday Adventist School zirlaite an tel.

He hun hi Fisheries Secretary Er Lalrothanga chuan Khuallian niin a hmanpui a. Mizoramah lui tui a tlem sawtin, luia cheng nungchate pawh an chereu sawt hle tih sawiin, kan luite enkawl ṭhat a ṭul tak zet tih a sawi a. Mizorama chengte'n kan luite ṭha taka kan enkawl loh chuan nakin lawkah chuan tui thianghlim in tlak leh tui hman tur hnianghnar neih zawh loh kan hmabak mai a hlauhawm thu a sawi a. Lui sangha leh nungchate humhalh rah sengtu chu a humhalhtute tho kan ni tiin, lui dung humhalh kawngah Fisheries Department-in dan leh inkaihhruaina a neih (Act & Rules) mila Department thawhpui thiam zel turin khawtlang hruaitute leh YMA branch tinte a sawm.

Khual zahawm, Lunglei Election Officer Pi Lalhruaitluangi pawhin thu sawiin, District Transformation Programme hnuaia District Catalytic Fund (Handholding) hmanga DFDO Office-in hun hlawhtling tak an buatsaih thei chu lawmawm a tih thu a sawi a. Lui dung humhalh ṭhat chu khaw mite ei leh in atan mai bakah, khualzin hipna leh sum lak luhna hnar ṭha tak a ni tel thei tih sawiin, khaw hrang hrang chu lui dung humhalh ṭhata inel zel turin a chah.

Lunglei District Fisheries Development Officer (DFDO) Pi Christina Lalramchhani'n hun kaihruaiin, inlawmna thu a sawi a. Lunglei District huam chhunga lui dung humhalh ṭha YMA group leh branch chawimawina hun hman niin, lui dung humhalh ṭhaa thlan YMA Vanva Group, YMA Hlumte Branch leh YMA Hauruang Branch te hnenah pawisa fai ₹5,000/- leh thuziak hlan ṭheuh a ni a. YMA Sub-Headquarters Lunglei Secretary Pu C. Lalrindika leh Fisheries Inspector Pu Lalsiamliana te'n thu an sawi bawk.

Chawhnu lamah Lunglei DFDO Pi Christina Lalramchhani leh Fisheries Extension Officer Pu Lalruatfela Chhangte te'n Mizoram Fisheries Amendment Act, 2022 leh Mizoram Fisheries Rules, 2019 chungchang zirtirin, lui dung leh luia nungchate enkawl leh humhalh dan te, sangha man theih dan leh man theih hun te, danin a phal leh phal loh leh hremna hrang hrang awm thei te an sawi fiah a. Zawhna leh chhanna hun hman niin, Fisheries Department leh khawtlang thawh hona kawnga thil pawimawh hrang hrangte sawi ho a ni bawk a. Assistant Fisheries Officer Pu T. Vanlalchhuanawma'n lawm thu sawiin hun a khar.