4302/2024-2025

Lunglei, 2025 Ramtuk thla ni 18: Mizoram Road Safety Council-in kumin 2025 February thla hi lirthei chetsualna laka him nana fimkhur tura inzirtir uar thla (Road Safety Month) atan a puan angin, tukin zingkar khan Lunglei Venglai Traffic Point-ah hemi pual hian hun hman a ni a. Lunglei District Additional Deputy Commissioner Pi Rochuangkimi Khenglawt chuan khuallian niin hun a hmanpui.

Khuallian Pi Rochuangkimi Khenglawt chuan February thla puma Road Safety Month hmang tura sawrkar ruahmanna chuan lirthei khalhtu, hmangtu leh mipui kea kalte himna tur sawrkarin a ngaihtuah hle tih a lantir tiin, lirthei khalh leh hman chungchangah fimkhur leh dan zawm pawimawhzia hre thar turin mipuite a chah a. Hriselna tura kan inenkawl uluk a, sum tam tak senga damna kan zawn laiin, tu emaw lirthei khalh fimkhur loh vangin nunna leh bungrua kan chanin, sum tam tak senga inenkawl a ngaih phah ṭhin tiin, chu chu fimkhurna hmanga pumpelh theih a ni, a ti a. Kum tling lova lirthei khalh te, thunun zawh loh khawpa chaka lirthei khalh leh rui chunga lirthei khalh te chu dan bawhchhiatna a nih bakah, chetsualna thlentu lian tak a nih avangin chin zui loh tum turin mipuite a chah a. Dan chu lirthei khalhtute tichep tur ni lovin, mi tin himna tura duan a nih thu sawiin, dan zawm chu kan himna leh kan tih tur a nih thu leh khua leh tuite'n him tlang taka nunkhua kan hman theih nan dan zawm a pawimawh thu a sawi a. Kumin Road Safety Month thupui, "Fimkhur leh him takin lirthei khalh ṭhin ang che" tih chu zawm ṭheuh turin lirthei khalh ṭhin zawng zawngte a chah a ni.

Lungleia Road Safety Month puala hun hman hi Lunglei District Transport Office-a SIS Pu H. Lalramchhana'n kaihruaiin, nikum chhunga an hma lakna report a pe a. Lunglei District Additional Superintendent of Police Pu K. Beihmotaosa pawhin thu sawiin, an hma lakna hrang hrang a tar lang a. Lunglei High Powered Committee (HPC) sum aṭangin Lunglei Police te'n Zotlang leh AOC Veng thlengin kawngpui chhinchhiahna leh eng (road divider stud) an vuah thar thu leh a bak pawh vuah belh tura ruahman a nih thu sawiin, khawpui cheitu a nih bakah, kawngpuia lirthei khalhtute himna tura hma lakna pakhat a nih thu a sawi a. Nikumah Lunglei Municipal Council (LMC) aṭangin kawngpui leh a vel cheina hmuh a nih thu leh State Bank of India (SBI) aṭangin traffic cone leina tur dawn a nih thu sawiin, Lunglei khawpui chhunga traffic duty-na umbrella point 12 chu chei ṭhat a nih thu leh sponsorship tender chhuah mek a nih thu a sawi a. Tun Road Safety Month kalpui chhungin traffic rules inzirtirna buatsaih a nih tawh thu leh Lunglei Government College NCC te nen inkawpa lirthei tlan thlithlai (joint duty) tum a la nih thu a sawi a. Traffic police awmnaah mipuite'n thu kan awih laiin, an awm lohva inthlahdah kan la tam chu hmasawnna tur a nih thu a sawi.

He hunah hian sawrkar official-te bakah, Lungleia lirthei neitu leh khalhtu pawl hrang hrang leh District MJA member-te an tel a. Traffic Incharge Pu Lalṭhabuanga kaihhruaiin kal khawmte'n thutiam (Road Safety Pledge) an sawi rual bawk.

Kum 1988-a din National Road Safety Council ruahmannain kum 1989 atang khan India ramah kum tin chawlhkar khat chhung Road Safety Week hman ṭhin a ni a. Kum 2021 aṭang khan a thla puma hman turin Road Safety Month ruahman leh hman ṭan a ni.

Lunglei DTO office report aṭanga a lan danin, nikum chhung khan Lunglei District-ah lirthei kaihhnawiha dan bawhchhia man leh chawitir mi 426 an awm a, hemi aṭang hian ₹ 6,95,000/- hmuh a ni a. IndiaRAP (India Road Assessment Programme) portal-a chhinchhiah chinah lirtheia chetsualna ṭum 40 leh IndiaRAP portal-a chhinchhiah bakah ṭum 18, a zavaiin lirtheia chetsualna ṭum 58 thleng anga chhinchhiah a ni.

Nikum 2024 January aṭanga kumin February thla thleng hian Lunglei Police te chhinchhiah danin Lungleiah lirtheia chetsualna ṭum 16 thlengin, he'ng chetsualnaah hian mi 14-in nunna an chan bakah, mi 18-in hliam an tuar a. He'ng lirthei chesualte hi 2-wheeler 6, 3-wheeler 2 leh 4-wheeler 10 an ni. Nikum chhung khan traffic dan bawhchhia mi 1,557 (2-wheeler 1,003; 3-wheeler 93 leh 4-wheeler 461) man niin, pawisa chawitir tling khawm chu ₹ 19,51,700/- a ni a. Kum 2023-a chawitir tling khawm ₹ nuai 23 chuang nen khaikhinin dan zawm kawngah hmasawnna a awm tih a lang.

Lunglei Police te hian lirthei khu chhuahna siam danglam (modified exhaust) an man sa chu Court phalnain ṭum 2 an tichhe tawh a. Modified exhaust hi a vaiin 70 vel tihchhiat ni tawhin, tihchhiat tur man sa 10 vel a la awm a. Modified exhaust veh hna hi an la kalpui reng bawk a ni.