No.7193/2020-2021 

Kumin 18th January atanga 17th February chhunga hman tur Road Safety Month ‘Fimkhur la, nun humhim rawh’ tih thupui hmanga kalpui tur chu vawiin khan Lunglei Additional DC Pu R. Vanrengpuia chuan Lunglei DTO Office-ah a hawng. He hunah hian Lunglei SP Pu Stephen Lalrinawma leh official dangte, Lungleia Zoram Drivers Union hotute, Driver Association hrang hrang hruaitute, chanchinbumite leh tlawmngai pawl aiawhte an tel a ni.

Pu R. Vanrengpuia chuan Road Safety puala kum danga kar khat chhung hun hman thin chu kuminah thla kat lai daih tura sawrkarin a rawn pawt sei chuan Road Safety pawimawhna leh hemi kawnga kan zavaia tan kan lak a tul zia a ti lang chiang hle a ni tiin lirthei khalhtu leh mipuite hnena himna leh fimkhur zirtirna huap zau thei ang bera kalpui a tul thu a sawi a.  Mitinte kan him tlan theihna turin lirthei khalhtute leh mipuite kan fimkhur tlan a tul a ni tiin kan kawng neihte kan zah thiam a, kan duat tlan a tul a ni, a ti a. Lirthei chetsual avanga mi tam takin an nunna hlu tak an chan thin chu pawi a tih thu sawiin  Lunglei Additional DC chuan kumin Road Safety Month thupui ‘Fimkhur la, nun humhim rawh’ tih chu month chhung chauha hmang lova engtiklai pawha an thinlunga vawng reng turin kalkhawmte a chah a ni.     

Lunglei SP Pu Stephen Lalrinawma pawhin thu sawiin Ministry of Home Affairs hnuaia National Crime Records Bureau (NCRB) ina report danin nikum 2019 chhung khan lirthei chesual avangin India ramah mi 1,15,000 in nunna an chan a ni, a ti a. Lunglei District ah kum 2020 chhung khan lirthei chetsualna avangin mi pakua (9) in nunna chanin mi 10 in hliam an tuar a. Lirthei chetsualna thleng thei laka mipuite an him theihnan Lunglei Police ten theihtawp an chhuah mek zel thu sawiin hemi kawnga dan bawhchhia te pawh fine chawi tir zel niin nikum 2020 January atanga December thleng khan Lunglei District-ah Fine cheng 5,41,500 tling khawm a awm thu Lunglei SP chuan a tarlang. National Highways and Infrastructure Development Corporation Limited (NHIDCL)-te nen tangkawpin tun thla chhung hian Lunglei thalaite tan Road Safety Rally neih tum anih thu a sawi bawk.

Road Safety Month 2021 hawnna inkhawm hi Lunglei DTO & Member Secretary District Road Safety Committee Pi Carolyn LB Khiangte chuan a kaihruai a. Road Safety Month chhung hian helpdesk siam, road safety inzirtirna banner tar chhuah, talk show, khaw tin VC-te road safety thuchah puan tir, leaflet leh pamphlet sem chhuah leh hmalakna dang hrang hrang kalpui anih tur thu DTO hian a puang a. Kalkhawmte hian Road Safety Pledge an sawiho bawk a ni.