No.7194/2020-2021 

January ni 18, 2021 atanga February ni 17, 2021 thleng (thla khat chhung) hman tur lirthei chetsualna laka him nana fimkhur tura inzirtir uar thla (Road Safety Month) chu Lawngtlai District tan tukin zingkar khan Lawngtlai Bazar Venga Areopagy hmunah District Bawrhsap Dr Andrew H. Vanlaldika'n a hawng.

Bawrhsap Dr Andrew H. Vanlaldika chuan lirthei chetsual avanga mihring nunna hlu tak leh bungraw tam tak hloh thin tihtlem nan fimkhur taka lirthei khalh chu thil pawimawh ber pakhat a nih thu a sawi a. Lirthei changkang tak tak nei mah i la, a khalhtute kan changkan ve si loh chuan hnawksak leh chhiatna thlentu mai a ni thei tih sawiin; lirthei chet vel dan kaihhruaina leh khuahkhirhna (traffic rules and regulations) hriat chian a, zawm that te; lirthei khalh kawnga nungchang mawi (driving etiquette) nunpui te; mi dang tana hnawksak lo leh hlauhawm lo tura lirthei hun thin te; khawpui mawi nan leh hriselna atana lirthei vawn fai leh tihthianghlim te chu thil pawimawh leh tih ngei ngei tur a nih thu a sawi a. Lirthei chetsualna titlem tura hma laknaah sawrkarin theih tawp chhuah mah se, mipui thawhpuina leh tawiawmna tel lo chuan a hlawhtling thei lo tih sawiin, Road Safety Month, 2021 thupui, "Fimkhur la, nun humhim rawh" tih chu tihlawhtling ngei turin District mipuite a chah a ni.

Lawngtlai District tana Road Safety Month hawnna hun hi Sub-Divisional Officer (Sadar) Pu V. Lalruatliana'n a kaihruai a. Lai Autonomous District Council hnuaia District Council Transport Officer Pu F. Lalhmachhuana'n lawm thu sawina hun a hmang bawk.

Kum 1988-a din National Road Safety Council ruahmannain kum 1989 atang khan India ramah kum tin Road Safety Week hman thin a ni a. Kumin 2021-ah chuan a thla puma hman turin Road Safety Month ruahman a ni ta a ni.

Lawngtlai District-ah kum 2020 chhung khan lirthei thar 902 chhinchhiah niin, kum 2021-ah January ni 15 thlengin lirthei thar 72 chhinchhiah belh a ni leh tawh a, tun thlenga Lawngtlai District-a lirthei thar ziah luh leh chhinchhiah tawh zat chu 7,396 a ni.

Lawngtlai District-a Road Safety Month hman chhung hian mipuite tanpui nan leh an hriat duh zawngte hrilhfiahna tur Help & Guidance Desk buatsaih tum a ni a. Local Cable TV-a pek chhuah turin thil pawimawh sawi hona (talk show) buatsaih tum a ni bawk a. Hei bakah hian sumdawng lirthei khalhtu tha (best driver) leh traffic police thawk tha thlan an ni dawn bawk.