No.7195/2020-2021 

Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. Lawngtlai District-a hriselna lama thawktu (health care worker)-te hnena COVID-19 hri danna (vaccine) pek dan tur ruahmanna leh hri danna dang kaihhnawiha hma lakna tur hmachhawp te an sawi ho.

He thut khawmah hian Lawngtlai Chief Medical Officer Dr LP Malsawma bakah, health department leh ICDS lam official-te an tel a. Chairman, Dr Andrew H. Vanlaldika chuan COVID-19 hri leng dona kawnga Lawngtlai District chhunga hriselna lam kaihhnawih hna thawktu (healthcare worker)-te leh ral hmatawnga thawk (frontline worker) dangte inpeknaah lawm thu a sawi a. COVID-19 hri danna peih fel a ni ta chu lawmawm a tih thu sawiin, hri danna lak chungchangah a hlauhawm ni awm anga thu belh chian dawl lo theh darh a awm paw'n chi-ai phah lo tur leh damdawi lam mi thiamte leh sawrkar thu ngaichang thiam turin District mipuite a chah.

Member Secretary, District Immunisation Officer Dr S. Thaizi chuan COVID-19 hri danna chu ni 17.01.2021 (Pathianni) khan Lawngtlaiah dose 750 phurh thlen a ni tawh tih sawiin, pek chhuah thuai a tul thu a sawi a. Pek hmasak tura ruahman, healthcare worker (doctor, nurse, health worker, ASHA leh anganwadi worker & helper), portal-a an hming ziah luh tawhte atanga bul tan tur niin, he'ng zingah pawh hian raipuar, nau hnute pe lai leh damlo na deuhte chu pek rih loh tur a ni tih a sawi. 

DTFI thut khawmah hian COVID-19 hri danna hi Lawngtlaiah chuan ni 19.01.2021 (Thawhlehni)-ah pek chhuah tan ni se, tih a ni a. Zing dar 9:45-ah District Hospital Lawngtlaiah Lawngtlai East bialtu MLA Pu H. Biakzaua hovin a khuhhawnna buatsaih a ni ang a, hri danna hi pek tan a ni ang. Hri danna pe chhuak tura hmunhma buatsaih ngai leh inpuahchahna pawh peih fel a ni tawh tih ngaihthlak a ni.

Data Manager-te'n an report danin, hri danna la thei tur hian Lawngtlai District chhunga healthcare worker mi 1,132 hming theh luh (upload) a ni a. Hming pe lut tawhte pawh an hriselna leh taksa dinhmunin a zir loh avanga la thei lo turte thliar fel leh vek a nih hnuah, intihluihna awm lovin mahni duhthua la turte chauh approve an ni dawn a. Hun ruat (session) vawi khatah mi 100 bak hri danna hi pek theih a ni dawn lo bawk a ni. Vaccine pekna hmun tur hi Lawngtlai District chhungah hmun 7 ruat a ni a, a hawn ni-ah erawh District Hospital Lawngtlaiah chauh pek a ni rih ang.

He hunah hian National Immunisation Day kalpui dan tur sawi ho nghal a ni a. Zenghri danna pek runpui, Pulse Polio Immunisation Day hi India ramah January ni 31-a hman tur ni mah se, Pathianni a nih avangin Mizoramah chuan February ni 2-ah hman a ni dawn a. Nausen piang hlim atanga naupang kum 5 chin hnenah zenghri danna hi pek tur niin, kawthalo vei tih loh chuan natna dang vanga damlo pawhin an la thei vek a. Lawngtlai District chhungah he hri danna hi la thei naupang 16,106 an awm mek a ni.

He hunah hian dan pangngaia hri danna chi hrang hrang pek thin (routine immunisation) chungchanga hma lakna tur hmachhawp hrang hrang te pawh sawi ho a ni bawk.