No.767/2021-2022

Aizawl, 1st June, 2021 : Health & Family Welfare department chuan vawiin khan thuchhuah siamin Lungleiah RT-PCR Laboratory bun tura hma an lak thu a hnuaia tarlan ang hian an sawi

Lunglei District mipuite duh leh mamawh chu sawrkarin ngai pawimawhin uluk takin a ngaihtuah a. RT-PCR Machine dahna tur hmun him tangkai taka hman theihna tur ‘Laboratory Block' siam tumin hma a la mek a ni. He 'Laboratory Block’ hi Civil Hospital, Lunglei compound chhungah ngei dah turin ruahmanna siam a ni a, cheng vaibelchhe 7.8 man hu Detailed Project Report (DPR) pawh siamin NEC ah a thehlut tawh nghe nghe a ni. He DPR hi NEC ah umzuiin sanction hmuh thuai beisei a ni. DPR ah hian Laboratory building bakah hmanraw chi hrang hrang mamawh tur pawh a tel nghal a ni.

RT-PCR Laboratory bika thawk tur hian staff hrang hrang a tlem berah mi 10 mamawh a ni a, hemi atana senso tur chu kum khatah cheng nuai 32 chuang a ni. Nitin sample 100 vel test tura chhutin (Pathianni tiam lovin) a bawlhlo neuh neuh ah hian kum khatah
cheng nuai 192 chuang fe hman a tul ang. Tichuan a thawktu leh hmanrua senso zat tur chu kum 1 ah cheng nuai 234 aia tlem lo a ni ang.

Heng zawng zawng hi a puitlin hma chu Truenat Quattro 1 an kawl lai bakah a dang (a tul chuan pakhat aia tam) sawrkarin lei belh turin hma a la mek a ni. Truenat Quattro hian ni khatah sample 40-45 a test thei a, 2 kan neih chuan ni khatah sample 80-90 tal chu kan test thei dawn a ni.