961/2025-2026

Lunglei, 2025 Nikir thla ni 26: Vawiin khan Artificial Limbs Manufacturing Corporation of India (ALIMCO) leh Lunglei District Administration ṭang kawp huaihawtin Project LEAP (Lunglei’s Empowerment for Access and Equity for all Persons) hnuaiah Lunglei Serkawna Baptist Higher Secondary School (BHSS) Tucker Hall-ah 'Samajik Adhikarita Shivirs' (Social Empowerment Camp) buatsaih niin, Lunglei District chhunga vohbik (person with disability - PwD) leh upa kum 60 chung lam ṭanpuina hmanraw mamawhte hnenah a thlawnin ṭanpuina hmanraw chi hrang hrang sem a ni a. Lunglei High Powered Committee (HPC) Vice Chairman Pu V. Malsawmtluanga chu khuallian niin, Lunglei District Bawrhsap Pi Navneet Mann chu khual zahawm a ni.

Lunglei HPC Vice Chairman Pu V. Malsawmtluanga chuan Lunglei DC kaihhruaia Project LEAP kalpui mekah vohbik leh upa ṭanpuina mamawh, mahnia ngaihtuah dan hre si lo eng emaw zat zawn chhuah a, an hamṭhatna tur buaipuisak an ni chu lawmawm a tih thu sawiin, ALIMCO aṭanga ṭanpuina hmanraw chi hrang hrang dawngtute lawmpuina hlanin, Project LEAP team-te duhsakna a hlan a. India sawrkar leh Mizoram sawrkarin vohbikte leh upate a ngai pawimawhin, an tan theih tawpin hma a la tih sawiin, an hmasawnna leh hamṭhatna tur dan ṭha tak tak pawh duan a nih thu a sawi a. Mizoram sawrkar hna lakah pawh vohbikte tan post hauh ṭhin niin, vohbik tam takin mahni kea din nan leh chhungkaw chawm nan an hmang tawh tih sawiin, SCERT chuan kum 1985 aṭangin vohbikte zirna (Education of the Disabled) a kalpui tawh thu leh Mizoram sikul hrang hrangah vohbikte tana ruahmanna siam ṭhin a nih thu a sawi a. Vohbikte chu mi bik, theihna bik nei an nih thu sawiin, an theihnate hai chhuak zel turin anmahni leh anmahni enkawltute chu theih tawp chhuah turin a chah a. Kum lama upate pawh in chhungkhur leh khawtlangah inkiltawih lo tura chahin, an tawn hriat leh finnate ram leh hnam hmasawn nan ziak leh ṭawngka pawha sawr chhuak a, ṭhangtharte finchhuahtu ni zel turin a chah a ni.

Pu V. Malsawmtluanga chuan vohbikte tana sawrkar hma lakna lawmawm tak tak tar langin, Indira Gandhi National Disability Pension Scheme (IGNDPS) hnuaia vohbikte hnena pension pek ṭhinah Mizoram sawrkarin thla tin ₹ 100 a pek ṭhin chu April 2024 aṭangin ₹ 1,000/-ah tihpun a nih thu leh sawrkar laipuiin thla tin ₹ 300/- a pek nen belh khawmin thla tina an pension hmuh chu ₹ 1,300/- a nih tak thu a sawi a. State Disability Pension Scheme hnuaia Mizoram sawrkarin vohbik zinga chhawmdawl ngai bik, mitdel leh khum bette tana kum khata ₹ 4,200/- chhawmdawlna a pek ṭhin chu kum 2024-25 sawrkar kum thar aṭangin ₹ 6,000/-ah tihpun a nih thu a sawi a. Handicapped Students Stipend hnuaiah kum khatah vohbik zirlai - primary school zirlaite hnenah ₹ 800/-, middle school zirlaite hnenah ₹ 1,000/- leh high school zirlaite hnenah ₹ 2,500/- pek ṭhin a nih thu a sawi a. National Divyangjan Finance and Development Corporation (NDFDC) kal tlanga vohbikte'n loan a pung tlem chi an lak theihna chu Lunglei District-ah pawh kalpui mek a nih thu leh vohbik lehkha thiam, District Employment Office-a inziak lutte tan kum khatah ₹ 7,800/- pek ṭhin a nih thu a sawi bawk.

Khual zahawm, Bawrhsap Pi Navneet Mann chuan Project LEAP chu nikum December thlaa hma lakna thlir hona aṭanga ruahmanna lo piang chawpin a hrin chhuah a nih thu sawiin, health & family welfare, social welfare, election leh department dang dangte'n vohbikte leh upate tan hma lakna an neih sa reng chu thawh hona aṭanga awmze nei leh darh zau zawka kalpui a nih theih nan ruahman a nih thu a sawi a. Project LEAP hnuaiah vohbik inchhiarna (PwD survey) buatsaih a nih bakah, hriselna endikna, UDID card leh ṭanpuina hmanraw dawng thei tura dil theihna atan health assessment camp te buatsaih a nih thu a sawi a. Project LEAP hma lakna kal tlanga sawrkar aṭanga hamṭhatna dawng thei tura UDID card la nei lo mi eng emaw zat UDID card siamsak an ni leh vohbik leh upa mi 741-in ALIMCO aṭanga ṭanpuina hmanrua an dawng thei tur chu Project LEAP hlawhtlinna a ni, a ti.

Lungleia 'Samajik Adhikarita Shivirs' buatsaihah hian Lunglei Municipal Council (LMC) Chairman Pu Lalzuithanga leh councillor-te, Superintendent of Police Pu J. Lalmuankima leh Lungleia sawrkar department hrang hrang hotute, MJA leh tlawmngai pawl hrang hrang hruaitute, vohbikte enkawlna - Lunglei Home TNT leh Onyx Special School-a zirlaite leh zirtirtute, BHSS zirtirtute, zirlaite leh NCC cadet-te leh mipui ṭhahnem tak an kal khawm a. Ministry of Social Justice & Empowerment hnuaia hamṭhatna - Assistance for Disabled Persons (ADIP) Scheme kal tlangin vohbik mi 54 hnenah leh Rashtriya Vayoshri Yojana (RVY) kal tlangin upa kum 60 chung lam mi 687, an vaiin mi 741 hnenah ri hriatna leh chet velna atana an hmanraw mamawh chi hrang hrang - tricycle, wheelchair, bengdar, mitdel tiang, zakdawh tiang leh hmanraw dang chi hrang hrang 3,448 chu a thlawnin sem a ni.

He inkhawmah hian Baptist Church of Mizoram (BCM) hnuaia Education & Social Concern Department Director Rev. RC Lalthanzama'n hunserh hmangin, ALIMCO-a Manager Pu Prakash Singh chuan ALIMCO hma lakna report a pe a. Additional Deputy Commissioner Pi Zoramdini chuan Election hnuaia SVEEP hma laknaah vohbikte leh upate tana hamṭhatna leh ruahmanna hrang hrang awmte tar langin, Lunglei District SVEEP PwD Icon pahnih - Lalnunpuia (Rahsiveng) leh Lalruatsaka (Lunglawn) te hnenah thilpek a hlan a. Lunglei District Social Welfare Officer Pu CL Joseph chuan hmanraw sem kaihruaiin, TNT, Onyx Special School leh BHSS zirlai aṭangin zai leh lam ngaihthlak leh thlir ho a ni a. Sub-Divisional Officer (Sadar) Pi TT Beikhaizi chuan lawm thu sawiin hun a khar a ni.