Vawiin khan District Disaster Management Authority, Lunglei leh Geology & Mineral Resources Department, Aizawl tangkawp buatsaihin Convention Center ah Lunglei Town Area   bakah Lungsen, Thenhlum, Mualthuam 'N' leh Hnahthial VC leh YMA member te pualin Sensitization and Awareness Training on Landslide, Crack and Land Sinking chungchang zirtirna hun hman ani. 

Pu Benjamin Lalzama, Addl. Deputy Commissioner & CEO, DDMA Lunglei chuan Awareness Training a VC leh YMA member lo kal te hnenah he hun ngaipawimawh a  an lo tel avangin lawmthu a sawi a. Khuarel chhiatna hi kan dan theih a ni lova, kan tih ve theih chu fimkhur a ni,  khuarel chhiatna 80% hi mihring siam chawp niin khawvel in a buaipui polythene tawih thei lo kan paih hian leimin a siam thei a ni a ti. Ram tana thil tha mithiam ten min zirtir tur hi ngun tak a zir a, mahni veng leh khua ah kan thiamna leh hriatna te hrilh hre theuh turin VC leh YMA member te a chah a ni. 

Pu Sanghnuna, Geologist Sr. Geology & Mineral Resources  Department, Aizawl  chuan leilung chanchin tlangpui ‘Introduction to Geology’ leh ‘Land Mass Movement and Tectonic Plate Movement’ tih thupuite hmangin zirtirna a pe a.   Bunghmun, Zotlang, Mualthuam'N' leh Hnahthial leimin,leikhi leh leitlakhniam dan zir chianna an neih atanga an thil hmuhchhuahte leh heng hmuna chhitana nasa zawk a thlen lohna tura hmalak tul te kalkhawmte a sawipui a. Pu Andrew Lalhruaia,  District Urban Development Officer, UD&PA Department Lunglei in mithiam te rawn chunga in sak dan leh sorkar dan anga insak dan tih thupui hmangin zirtirna a pe a. Pu C. Laldawngliana, SDO, PWD in Tui luankawr mumal tak siam leh kawngpui nek lutuk a insak that loh dan a sawi a.  Zawhna leh chhanna hun hman a ni bawk.