Vawiin khan Lunglei East bialtu MLA leh Mizoram Youth Commission Chairman ni bawk Pu Joseph Lalhimpuia chuan Zobawk North Community Hall cum Handloom Common Facilitation Centre (CFC) sakna tur lungphum a phum. He hunah hian sawrkar official-te, tlawmngai pawl aiawhte, khawtlang hruaitute, zirlaite leh mipui thahnem tak an tel.

Pu Joseph Lalhimpuia chuan hun reilote chhungin Zobawkah hmasawnna hmuh theih engemawzat a awm chu a lawmpui thu sawiin heng hmasawnna ruhrel te hi neitu rilru pu chunga uluk leh dim taka enkawl turin mipui kalkhawmte chu a chah a. Tui hnianghnar tawk loh avanga Zobawk mipuite harsatna tawh mek chu a hriatpui thu sawiin Zobawk North-ah tui litre nuai hnih (2) lenna tur tui dah khawlna (water reservoir) siam thuai turin PHE hotuten hma an lak mek thu a tarlang a. NABARD sum kaltlanga Zobawk Primary School, Middle School, High School leh Higher Secondary School building-te sak that a nih tur thu te, cheng nuai 126.75 senga sak khum sawm (10) awmna tur Zobawk Primary Health Centre (PHC) hawn thuai a nih tur thu te a tarlang bawk.

Mizoram Youth Commission  hmalakna sawiin MYC Chairman chuan thalaite hmasawn nan  theihtawp chhuah a hma lak mek a ni a, tun hnaia sipai lak tur atan pawh Mizo thalaite a tam thei ang ber lak an nih theihna turin MYC kaltlangin inzirlawkna Pre-Recruitment Training District tinah buatsaih mek a nih thu a sawi a.  SSC Coaching, NEET leh IIT-JEE exam coaching, IAS Coaching leh IELTS Training-te hlawhtling taka kalpui mek a nih bakah thalaite zirna lama chawk phur turin hmalakna hrang hrang Youth Summit and Road Show, Young Achievers Award te buatsaih a nih thu a sawi a. Zirna kawnga hmasawnna ruhrel pawh tih changltung zel niin MYC Coaching Centre leh MYC Office tur Electric Veng, Lungleiah buatsaih mek a nih thu a tarlang bawk.

He hun hi Pu K. Lalrodinga, VCP Zobawk North in kaihruaiin Pu F. Lalrinawma, President Bazar Branch YMA Zobawk in lawmthu sawina hun a hmang bawk.

Er Samuel Lalrawngbawla chuan Technical Report pe in Zobawk N Community Hall cum Handloom CFC chu NEDP kaltlanga cheng nuai 55.70 senga sak tura ruahman a nih thu a tarlang a. A basement floor hi Zobawk khuaa puantah tu ten a thlawna puan an tahna hmunpui tur Handloom Common Facilitation Centre (CFC) tura ruamhan niin a zau zawng hi 212 square metres a ni dawn a. Ground Floor hi Community/Multipurpose Hall tura duan niin a zau zawng hi 265 square metres a ni ang.