Vawiin khan Vana Pa Hall-ah Mizoram Sawrkar hmalakna lian ber New Economic Development Policy (NEDP) hnuaia hmachhawp pawimawh tak tak pathum – My NEDP, My Project (Mipui Mamawh Intawm Ruahmanna) a District tina pakhatna theuh te lawmman hlanna, BPL awmlohna khuate lawmman hlanna leh 3rd Mizoram Rahbi (Micro Start-Up Capital Competition) hawnna neih a ni a, Mizoram Chief Minister Pu Lal Thanhawla chuan khuallian niin a hmanpui.

He hunah hian khuallian Mizoram Chief Minister chuanMizoram hian khawvela human resource tha ber thalaite kan nei tha em em a, an tana khawvel eng siam tumin sawrkarin nasa takin hma a la a, Planning Department a thawktuten ram hmangaihna tak tak rilru pu in an ngaihtuahna leh theihna zawng zawng an seng a, New Economic Development Policy (NEDP) an duang chhuak a, NEDP hi Mizorama development plan kan neih tawh zawng zawngah a la huapzau ber a ni a ti a, he ruahmanna hi a that em avangin India ram hmun hrang hrang atang leh sawrkar laipui atang te hial pawh ngaihven hlawh a ni a, North Eastern Council (NEC) phei chuan India hmarchhak State zawng zawngah lehkha thawnin hetiang ruahmanna siam ve turin a hriattir nghe nghe a ni a ti bawk. Mizo thalai lehkhathiamte chu NEDP hi belchiang a zirchiang tura chahin abik takin Mizoram Rahbi (Micro Start Up) ruahmanna hnuaiah hian thalaite hmakhua sut enna tur chi hrang hrang a awm a, thalai lehkhathiam mahni ke a din tlat tum te tana tangkai tak tak a awm avangin ngaihven turin a sawm a ni.

Chief Minister chuan Mizoram sawrkar hnuaia Department hrang hrangah mi inthladah leh hlemhle tak tak tam mahse Mizoram hmangaihtu, mithahnemngai leh rinawm officer kan neih that em avangin Mizoram hmabak hi a eng zual zel a ni a ti a, Sawrkarin mi zawng zawng hna a pe seng lova, thalai ten mahni ke a ding a eizawnna ngelnghet leh tlo an neih theih nan NEDP kaltlangin hma nasa taka lak ani a ti a, “Magnetic Mizoram” tih hming phuahin Mizoram kan zuar a, Delhi, Mumbai, Kolkata leh Aizawlah te Road Show buatsaih ani chuan rah a chhuah nasa hle a, India ram mai nilo khawvel ramdang atangte pawhin sumdawng leh investor lian tak takin Mizorama hma rawn lak duhin dilna an rawn thehlut a, mahse Mizoramin kan zawh tawk leh kan phak tawk ang zela kalpui turin kan hotuten uluk takin an zirchiang phawt zel a ni a ti a, kan ram rohlu, nungcha leh ramngaw te hi a nihna anga humhalh hi kan mawhphurhna ani a, khualzin kan hip theihna atana pawimawh tak pakhat a ni a ti a, NLUP chungchang sawiin a dawngtu zingah hlawhchham an awm rualin a tam zawk chuan an hlawhtlinpui a ni a ti bawk.

Khual Zahawm Pu Lalsawta, Planning Minister pawhin thu sawiin NEDP hian kawng thar min hawn sak dawn a, thalai lehkhathiam ten an thiamna leh an tuina kawnga eizawnna tlo an neih theih nana kawng kawhhmuh chu a tum lian ber pakhat a ni  a ti a, MiMIR Project ruahmanna siamnaah Mizo thalaiten hma an hruai thuim hle a, theihna an nei ani tih a tilangchiang a, a phurawm hle a ni a ti bawk.

Vawiina lawmman sem My NEDP, My Project (Mipui Mamawh Intawm Ruahmanna) hnuaiah hian Mizorama khua/veng zawng zawngte chu an awmna district DC kaltlangin an khua/veng mamawh mipui zawng zawng huap leh khawtlangin an hlawkpui tur ni si ruahmanna siam tura sawm an ni a, Mizoram chhunga khua/Veng 347 (Aizawl District-70, Lunglei District-34, Siaha District-49, Champhai District-49, Kolasib District-38, Serchhip District-45, Lawngtlai District-44, Mamit District-18) atangin Project a lut a, District ti atangin Project tha ber pakhat theuh thlan a ni a, heng project tha ber neitu khua te hnenah hian Chief Minister-in lawmman atan lawmpuina thuziak leh tangka cheng vaibelchhekhat cheque a hlan a, heng lawmman dawng khua te chu:

Aizawl District atangin Sialsuk (Sialsuk Eco-tourism Development Innovation Project)
Lunglei District atangin Cherhlun (50 Kw Solar Power Plant)
Siaha District atangin New Siaha West (Integrated Mass Transit Terminal)
Champhai District atangin New Chalrang (NCR Organic Pineapple Processing Plant)
Kolasib District atangin Khamrang (150 Kw Power Grid Connected Solar Plant)
Serchhip District atangin Thenzawl (Loom Upgradation and Product Diversification)
Lawngtlai District atangin Sangau (Phawngpui Tourism Development Project)
Mamit District atangin Reiek (Organic and Eco-tourism  Facilitation Centre)

Mizorama BPL chhungkua awmlohna khua panga Champhai District ami vek – Pamchung, Rabung, Tlangmawi, Chawngtlai leh Riangtlei khaw hruaitute hnenah an khawtlang tihmasawnna tur “BPL-Free Villages Development Project” kaltlangin tangka cheng nuaih 40 leh lawmpuina thuziak hlan an ni a, tangka hi cheque a pek an ni.

Hei bakah hian Chief minister hian Mizoram Rahbi vawithumna Micro Start-Up  Capital Competition chu a hawng nghal bawk a, eizawnna kawng tha leh remchang dap chhuak thiamte puihna tura ruahman Micro Start Up hi vawihnih neih ani tawh a, a vawithumna a tel duh tan dilna form lakchhuah tur a ni a, Entrepreneurship Development Centre, ZIDCO Office building New Secretariat Complex ah leh EDS Cell, Planning & Programme Implementation Department Office Treasury Square ah te a lakchhuah theih a, online in planning.mizoram.gov.in/page/mizoram-rahbi-micro-startup-capital-competition ah dilna form leh guidelines a download theih bawk a ni. Project proposal te hi October ni 8, 2018 ral hma in thehluh vek tur a ni.