Lungleiah sikul naupangte bag rit lutuk tizangkhai tura hma lakna sawi ho a ni
3368/2024-2025
2024 Pawltlak thla ni 5: Sikul naupangte sikul kai ip (bag) rit lutuk avanga zirlaite'n harsatna an tawh loh nana hma lakna kal mek chungchang sawi hovin vawiin khan Lunglei DC Conference Hall-ah District Bawrhsap Pi Navneet Mann kaihhruaiin ṭhut khawm buatsaih a ni.
He ṭhut khawmah hian DC officer-te, school education department official-te, women & child development official-te leh DIPRO te an tel a. Additional Deputy Commissioner Pu James Miahlung chuan Lunglei District-a sikul naupang sikul kai ip rit lutuk tizangkhai tura hma lak tawh dan tlangpui a tar lang a. Sub-Deputy Commissioner Pi Lalhlimpuii Pachuau leh District Education Office lam aṭangin sikul hrang hranga endikna kalpui dan report ngaihthlak a ni bawk a. Hma lakna kal mek thlir ho niin, hma lak zui zel dan tur rel ho nghal a ni.
September ni 2, 2024-a Lunglei District Bawrhsap hova sikul naupang bag rit lutuk chhawk zangkhai tura hma lakna tharthawh tura rel a nih angin, Mizoram sawrkarin April ni 30, 2021-a hemi kaihhnawiha inkaihhruaina a lo chhuah tawh chu DEO aṭangin sikul hrang hrangin an zawm turin hriattirna chhuah a ni a. Sawrkar sikul bakah, private sikulte pawh hei hi zawm tura ngen niin, he inkaihhruaina hi sikulte'n an zawm dan endik tura inspection team din chuan Lunglei khawpui chhunga sikul 4-ah endikna an kalpui tawh a. Sikulte'n hriattirna hi an hmu kim lo nia hriat a nih avangin hemi hnu hian DEO aṭangin hriattirna chhuah nawn leh tawh a ni bawk a. Zirlaite'n sikulah lehkhabu an riah theih nan sikul tinah lehkhabu dahna (bookshelf) neih theih tum ni se tih leh zirlaite'n tui in tur rit tak tak an pai a ngaih loh nan sikul tinah tui in tur thianghlim leh hnianghnar awm thei se tih te chu committee duh dan a nih angin zirna inah te pawh ngenna siam a ni tawh bawk.
Vawiin ṭhut khawmah hian Lunglei District chhunga sikul tin dinhmun hriat a nih theih nan report format siamin sikul tin chhantir ni se tih niin, inspection team siam belhin, endikna tur checklist thar nen kum thar lamah sikul endikna kalpui chhunzawm ni se, tih a ni a. Sikul hotu (headmaster/principal)-te ko khawma hma lak dan tur inhrilhfiahna leh sawi hona (sensitisation) buatsaih rel a ni bawk.
