1302/2026-2027

Lunglei, 2026 Vawkhniahzawn thla ni 4: Election Commission of India (ECI) bul tuma May ni 20, 2026 aṭanga September ni 6, 2026 inkar chhunga uluk zawka electoral roll siam ṭhat runpui, Special Intensive Revision (SIR) of Electoral Rolls, 2026 kalpui meka Lunglei District-a assembly bial paruka Enumeration Form theh lutte hming chuanna draft electoral roll chu vawiin khan Lunglei District Election Officer Pi Navneet Mann chuan Lunglei DC Conference Hall-ah a tlangzarh a. Draft electoral roll hi political party ai awhte leh tlawmngai pawlte hnenah hlan nghal a ni.

Lunglei DEO Pi Navneet Mann chuan electoral roll dik leh felfai zawk a awm theih nan uluk zawka ennawnna SIR chu kum 2005 hnua a ṭum khat nan kalpui leh a nih thu sawiin, electoral roll-a chuang sate hming chhut luh (pre-mapping), inchhiarna lehkha (Enumeration Form) chhut chhuah, sem chhuah, lak khawm leh endik te a hun taka zawh fel a nih hnuah draft electoral roll tlangzarh theih a ni chu lawmawm a tih thu a sawi a. A hun taka eng kim peih fel a nih theih nana tha thawhtu – Electoral Registration Officer (ERO), Assistant Electoral Registration Officer (AERO), Election Branch, Booth Level Officer (BLO & Asst BLO), Supervisor, Booth Level Assistant (BLA), Local/Village Council (LC/VC), political party, tlawmngai pawl (YMA, MHIP, MUP, adt.), thu thar theh darhtute leh mipuite chungah lawm thu sawiin, hmabak la awmah pawh an thawhpuina leh ṭawiawmna a ngen a. Mipuite chu draft roll tlangzarh takah an hming a chuan leh chuan loh ngaihven tura chahin, July ni 4 aṭanga August ni 4, 2026 inkar chhunga roll-a inziah luh thar, hming paih, hming thlak, insawn, siam ṭhat leh sawisel duh neite tana hun hawn chu chhawr ṭangkai turin mipuite a sawm.

SIR 2026 draft electoral roll tlangzarhnaah hian Election official-te, ERO leh AERO te, DIPRO/DMNO te, political party hrang hrang, NGO hrang hrang leh MJA ai awh te an tel a. Election Officer Pi Lalhruaitluangi chuan SIR kalpui mek leh draft electoral roll dinhmun tlangpui a tar lang a. ERO-te, DMNO, YMA ai awh leh MJA ai awhte'n thu an sawi bawk.

Vawiina SIR 2026 draft electoral roll tlangzarh takah hian Lunglei District chhunga assembly constituency parukah vote nei mi 98,808 (mipa 48,918 leh hmeichhia 49,890) awmin, Lunglei District aṭanga sipaia ṭang service voter-a inziak lut mi 478 an awm bawk a. 30-Lunglei North-ah voter 17,511 (mipa 8,478 leh hmeichhia 9,033) leh service voter 75; 31-Lunglei East-ah voter 15,763 (mipa 7,425 leh hmeichhia 8,338) leh service voter 70; 32-Lunglei West-ah voter 15,327 (mipa 7,251 leh hmeichhia 8,076) leh service voter 65; 33-Lunglei South-ah voter 18,686 (mipa 9,104 leh hmeichhia 9,582) leh service voter 124; 34-Thorangah voter 15,044 (mipa 7,852 leh hmeichhia 7,192) leh service voter 30; 35-West Tuipuiah voter 16,477 (mipa 8,808 leh hmeichhia 7,669) leh service voter 114 an awm.

SIR kalpui chhung hian Lunglei District-a polling station siam rem nghal niin, polling station thar pahnih – Electric Veng-IV (31-Lunglei East) leh Venglai-III (32-Lunglei West) siam belh a nih rualin, Dampui Sanctuary din a nih avangin Dampui Polling Station (34-Thorang) chu ṭhiah a ni thung a. Heti hian Lunglei North-ah PS 28, Lunglei East-ah 24, Lunglei West-ah 24, Lunglei South-ah 40, Thorangah 36 leh West Tuipuiah 29, a zavaiin Lunglei District chhungah polling station 181 a awm.

SIR 2026 kalpui ṭan tirhah Lunglei District-a AC parukah hian voter 1,03,037 awmin, voter awm zawng zawng tan Enumeration Form (EF) chhut chhuah leh sem chhuah kim a ni a. EF sem chhuah zawng zawng aṭang hian 98,808 chu endik leh finfiah niin, EF thun theih loh Uncollectable EF (ASDD) 4,229 a awm thung a. UEF/ASDD te hi voter thi tawh (death) 2,224; awm hmun sawn nghet (permanent shifting) 1,412; hmun khat aia tama vote nei (already enrolled/duplication) 160; chin hriat loh (absent) 410 leh sakhuana leh chhan dang vanga vote nei duh lo (others) 23 te an ni.

SIR 2026 draft electoral roll tlangzarh taka voter 98,808 aṭang hian mi 39,041 chu SIR 2005-a mahni ngei hming chuang tawh niin, mi 57,506 chu mahni la chuang lo, nu leh pate hming chuang tawh an ni thung a. Mahni emaw, chhungte hming emaw pawh chuang lo (no mapping) mi 2,261 awmin, anni hi an nihna tichiang turin lehkha pawimawhte theh lut tura hriattir an nih dawn bakah, ERO/AERO te hmaah inlan turin koh an ni ang.

SIR 2026 kalpui mekah hian India khua leh tui kum 18 tling chin, July ni 1, 2008 leh a hma lama piangte tan August ni 4, 2026 thlengin electoral roll-a inziah luh thar, paih, insawn leh siam ṭhat   dilna hun hawn a ni a. Dilna hi BLO-te kal tlangin emaw, ERO-te hnenah emaw theh luh theih a ni a. Dilna lutte chu ERO-te'n dan anga an chin fel hnuah, September ni 6, 2026-ah final electoral roll chu tar chhuah tura ruahman a ni.