2076/2026-2027

Lunglei, 2026 Mimkut thla ni 4: Vawiin khan Lunglei District Election Officer (DEO) Pi Navneet Mann hovin Lunglei DC Conference Hall-ah electoral roll en nawn runpui, Special Intensive Revision (SIR) 2026 kalpui meka Final Electoral Roll tihchhuah tur chungchangah ṭhut khawm buatsaih a ni.

He hunah hian Election Officer Pi Lalhruaitluangi, Lunglei District-a Electoral Registration Officer (ERO) leh Assistant Electoral Registration Officer (AERO)-te, DIPRO/DMNO, political party hrang hrang ai awhte leh YMA Sub-Headquarters Lunglei ai awhte an tel.

Lunglei DEO Pi Navneet Mann chuan Lunglei District chhunga SIR kalpui dan leh hma lakna hrang hrang sawiin, SIR kalpui ṭan hmain Booth Level Officer (BLO)-te'n SIR 2005 mila Pre-SIR Mapping an lo tih lawk thu leh SIR kalpui hnuah in tinah kal chilha voter awm sate inchhiarna Enumeration Form (EF) an sem chhuah thu te, EF dah khah chungchangah BLO, tlawmngai pawl, Village/Local Council leh political party ai awhte'n nasa taka voter-te an puih thu te a sawi a. EF theh lutte hming chuanna Draft Electoral Roll chu July ni 4-ah tihchhuah a nih thu leh Lunglei District-ah Draft Roll-ah voter 98,808 an awm thu sawiin, an zinga mi 21,552 chu an nihna finfiah tura ERO leh AERO-te hmaa hearing-a inlan tura koh an nih thu leh a hun takah kim taka hearing buatsaih zawh a nih thu a sawi a. Electoral roll-a inthun thar, inpaih, insawn leh siam ṭhat dilna (Form 6, Form 7 & Form 8) lutte pawh a hun takah kim taka chin fel a nih thu a sawi.

Lunglei DEO Pi Navneet Mann chuan ERO leh AERO-te'n khaw chhia, kawng chhia leh harsatna hrang hrang karah an bial chhunga khaw tin tlawh chhuaka ngawrh taka hearing an kalpui thu sawiin, electoral roll-ah vote nei theite hmaih an nih lohna tur leh vote nei thei lote paih an nih theih nan fimkhur leh uluk taka hearing an kalpui thu te, khaw tinah VC/LC, tlawmngai pawl leh political party te nen inrawn tlanga fimkhur taka hma lak a nih thu a sawi a. Hearing zawh hnuah DEO level-ah endik leh vek a nih thu te, Chief Electoral Officer (CEO) Office-ah endik nawn tura thawn a nih thu te, Election Commission of India (ECI)-in a lo en nawn a, pawmpuina a lo pek hnuah tunah final electoral roll chu her chhuah theiha peih fel a nih tak thu te a sawi.

DEO Pi Navneet Mann chuan SIR hlawhtlinna atana ERO, AERO, Election Official, BLO, BLO Supervisor, BLA, YMA, YCA, MHIP, MUP, Village/Local Council, political party leh MJA/media te ṭhahnem ngaihna, thawh rimna leh thawhpuinaah lawm thu a sawi a. Zavaia thawh hona leh ṭan rualna avangin Lunglei District chuan electoral roll dik, felfai leh thianghlim a neih ngei a beisei thu a sawi.

Election Officer Pi Lalhruaitluangi pawhin electoral roll ennawn chungchanga Lunglei District dinhmun tlangpui a sawi a. ERO leh AERO-te hnen aṭangin hearing an kalpui dan leh an tawnhriatte ngaihthlak niin, zawhna leh chhanna leh sawi hona hun hman a ni bawk.

SIR kalpui mekah hian Lunglei District-a Assembly Constituency paruk – 30-Lunglei North, 31-Lunglei East, 32-Lunglei West, 33-Lunglei South, 34-Thorang leh 35-West Tuipui-a Final Electoral Roll chu September ni 7, 2026 chawhnu dar 2:30-ah tlangzarh tura ruahman a ni.