2730/2024-2025
2024 Khuangchawi thla ni 29: Kum tina a bika electoral roll ennawnna kalpui ṭhin, special summary revision, 2025-a behchhana hman tur Lunglei District-a assembly bial paruka draft electoral roll chu vawiin khan Lunglei District Election Officer Pu R. Lalṭhazuala chuan Lunglei DC Conference Hall-ah a tlangzarh a. Draft electoral roll hi political party ai awhte hnenah Deputy District Election Officer Pu James Miahlung chuan a hlan nghal a ni.
Lunglei DEO Pu R. Lalṭhazuala chuan India ram chu inthlang ram kan nih angin khua leh tuite'n vote thlak chanvo kan nei a, chumi hlen chhuak thei tura kawng pawimawh tak pakhat chu electoral roll-a inziah luh hi a ni, a ti a. Electoral roll-ah hmaih nei lova khua leh tui kum tling chin an chuan theih nan sawrkar leh mawhphurtute'n theih tawpin hma an la tih sawiin, roll-a inziak lut tura kum chhiarna kum tin January ni 1 chauh hman ṭhin pawh kum chhiarna ṭum 4 (quarter tin) ruahman a ni tawh tih a sawi a. Khua leh tui kan nih angin electoral roll-a chuan chu kan chanvo leh mawhphurhna a ni tiin, SSR 2025 kalpui chhunga roll-a inziah luh, hming paih, hming thlak leh insawn duhte tana hun hawn chu chhawr ṭangkai turin District mipuite a sawm a. Electoral roll ennawn kawngah sawrkar chauh a mal ṭan thei lo tih sawiin, a puanzarna kawnga thawhpuitu chanchinbu mite leh roll felfai a awm theih nana thawhpuitu NGO-te chungah lawm thu a sawi bawk.
Vawiina draft electoral roll tlangzarhnaah hian election official - ERO leh AERO te, DIPRO te, political party hrang hrang, NGO hrang hrang leh MJA ai awh te an tel a. Election Officer Pi R. Lalrinzuali chuan hun kaihruaiin, special summary revision neih tura hunbi ruahman hrang hrang a tar lang a. Tun hnaiah Lunglei District chhungah polling station thar pali siam belh a nih thu a tar lang bawk.
Draft electoral roll tlangzarh tak aṭanga a lan danin, polling station (P/S) 28 awmna 30-Lunglei North (ST) Assembly Constituency (A/C)-ah vote nei mipa 8,615 leh hmeichhia 9,135, an vaiin mi 17,750 an awm a; P/S 23 awmna 31-Lunglei East (ST) A/C bialah vote nei mipa 7,760 leh hmeichhia 8,567, an vaiin mi 16,327 an awm a; P/S 23 awmna 32-Lunglei West (ST) A/C bialah voter mipa 7,442 leh hmeichhia 8,238, an vaiin mi 15,680 an awm a; P/S 40 awmna 33-Lunglei South (ST) A/C bialah voter mipa 9,281 leh hmeichhia 9,735, an vaiin mi 19,016 an awm a; P/S 37 awmna 34-Thorang (ST) A/C bialah voter mipa 7,878 leh hmeichhia 7,296, an vaiin mi 15,174 an awm a; P/S 29 awmna 35-West Tuipui (ST) A/C bialah voter mipa 9,061 leh hmeichhia 7,994, an vaiin mi 17,055 an awm a; Lunglei District chhunga assembly bial parukah hian vote nei mipa 50,037 leh hmeichhia 50,965, an vaiin mi 1,01,002 an awm a ni.
Vawiinah hian service voter roll pawh tlangzarh nghal niin, Lunglei District aṭanga sipaia ṭang service voter-a inziak lut mi 503 an awm a. 30-Lunglei North aṭangin 79; 31-Lunglei East aṭangin 76; 32-Lunglei West aṭangin 70; 33-Lunglei South aṭangin 135; 34-Thorang aṭangin 30 leh 35-West Tuipui aṭangin service voter 113 an awm a ni.
SSR 2025 draft electoral roll ang chuan, Lunglei District chhunga polling station 180 awm zingah voter tamna ber polling station chu 32/16-Venglai-II P/S niin, voter 1,323 an awm a. Voter 25 awmna 34/24-Thehlep P/S chu voter tlemna ber a ni a. Mipa voter 649 awmna 35/11-Tuichawng-I P/S chu mipa voter tamna ber niin, mipa voter 11 awmna 34/24-Thehlep P/S chu mipa voter tlemna ber a ni a. Hmeichhe voter 733 awmna 32/16-Venglai-II P/S chu hmeichhe voter tamna ber niin, hmeichhe voter 13 awmna 34/7-Dampui P/S chu hmeichhe voter tlemna ber a ni thung.
Tun ṭuma special summary revision neih turah hian India khua leh tui kum 18 tling chin, January ni 1, 2007 leh a hma lama piang electoral roll-a inziah luh thar, paih, insawn leh siam ṭhat duhte tan November ni 28, 2024 thleng dilna hun hawn a ni a. January ni 6, 2025-ah final electoral roll chu tar chhuah tura ruahman a ni.
Attachment
- Loading attachment...
