2729/2024-2025

Dated Serchhip, the 29^th October, 2024: Vawiin khan Serchhip District Election Officer Pu Paul L Khuma, Serchhip Bawrhsap chuan Special Summary Revision of Electoral Roll 2025 neih tur atan draft electoral roll chu Serchhip DC Meeting Hall ah a tlangzarh.

DEO in a tlangzarh tak Draft Roll-a a lan danin Serchhip District pumpuiah voters mi 54,293 an awm a. Heng zinga 26,275 hi mipa niin hmeichhia 28,018 an awm a ni. Voter pumpui punna zat hi 132 niin mipa 33, hmeichhia 99 in an pung a. 26-Serchhipah voter 20,679; 27-Tuikumah voter 16,941; 28-Hrangturzoah voter 16,673 an awm a ni.

Kum bithliah hrang hranga thensawm niin kum 20 atanga 29 inkar an tam ber a, voter mi 15,053 an awm a ni.  Kum 30 atanga 39 inkarin an dawt a, voter 13,550 an awm a. Kum 80 chunglam hi voter 810 an awm a ni. 

Election Commission of India thupek angin Special Summary Revision 2025 neih turah vawiin October 29, 2024 atanga November 28,2024 chhung hian Electoral Roll-a inthunluh, siamthat, paih leh insawn te dil theih a ni a. Inthunluh dil thar tur chuan January ni 1, 2025-ah kum 18 a tling hman tur a ni a. Dilna hi mahni veng leh khuaa Booth Level Officer te hnenah lakhchhuah theih a ni. 

Draft Electoral Roll tlangzarh tak hi Serchhip District chhunga constitutency pathuma political party aiawh theuh te hnenah leh YMA hnenah vawiin programme-ah khan DC chuan a hlan nghal a. Sawiselna leh inhrilhriatna hun hawn chhung hian uluk taka zirchiang turin a chah a. Khua leh tui dik tak, vote nei rual ten vote an thlak ngei theihna tur leh Final Electoral Roll-a an chuan ngei theihna tura tan la theuh turin kalkhawmte DC chuan a sawm a ni. 

Vawiin meeting ah hian official te bakah political party hrang hrang aiawh te, MJA te, tlawmngai pawl aiawh te an tel a ni.