2728/2024-2025

Khawzawl, dated 29th October, 2024: Vawiin chawhma dar 10:30 a.m khan DC Meeting Hall-ah 22-Tuichang Assembly Constituency photo electoral roll chu tlangzarh a ni a, Deputy Commissioner leh District Election Officer ni bawk, Pu K. Vanlalthiana'n a tlangzarh a ni.

He hunah hian Pu Timothy R. Lalhmangaiha, Election Officer chuan Special Summary Revision (SSR) neih a nih thu te, polling station thar siam a nih thu te leh hmalakna hrang hrang a sawi a. DC Pu K. Vanlalthiana chuan thu sawiin Khawzawl district-ah voter an pung zel thei hi lawmawm a tih thu a sawi a, voter ni thei hming la ziak lo te hming ziak lut ngei turin a sawm a, voter zawng zawng te inthlan a awm apianga vote thlak ngei turin a sawm bawk a ni. Thu a sawi zawh hian DC chuan electoral roll hi a tlangzarh a, ERO, AERO, party hruaitu hrang hrang leh YMA hnenah copy a hlan nghal bawk a ni.

22-Tuichang Assembly Constituency-ah hian mi 26,733 ni tura ngaih (projected) a ni a, vote thlak thei zat hi mi 18,179 ni tura ngaih a ni. Vote thlak thei tura hming pe (registered) hi mi 17,717, mipa 8,814 leh hmeichhia 8,903 an ni a, February ni 8, 2024 a SSR neih atang khan voter 142 an awm belh a, 0.81% in an pung. Polling station voter tamma ber hi Khawzawl Electric niin voter 787 an awm a, an tlemna ber hi Arro Village niin mi 117 an awm a ni. Tuichang bialah h mihring 1000 zelah mi 663 in vote an nei tihna a ni. Polling station thar pakua (9) - Khawzawl Darngawn II, Khawzawl Zaingen II, Khawzawl Zuchhip II, Khawzawl Dinthar II, Khawzawl Vengthar II, Khawzawl Hermon II, Tualte II, Khawhai II (Khawhai II ni sa kha a hming Khawhai III ah thlak a ni) leh Sialhawk III - siam an ni bawk. Voter-ah hian kum 18 - 19 inkar 19.62% in an pung a, kum 80+ hi 4.21% in an tla hniam thung a ni.