2727/2024-2025

Aizawl, the 29th October 2024: Vawiin khan Mizo Inneih, Inthen leh Rokhawmna Dan ennawntu, a Review Committee chu an Chairman Pu Zamingthanga Ralte, Addl. Secretary, Law & Judicial Department hovin Secretary Conference Hall-ah a vawi khatna atan an thukhawm. 

He Dan the Mizo Marriage, Divorce and Inheritance of Property Act, 2014 hi Law Commission kut chhuak niin Mizoram Assembly chuan kum 2014 khan lungrual takin a pass a, Ni 13.02.2015 atang khan hman tan a ni. He Dan hman a nih atang hi chuan Mizo Customary Law kan tihfo kha hman a rem tawh lo a ni. Kum 10 dawn lai hman a nih tak hnu hian siamthat ngai leh belh leh paih ngai te a lo awm a, Mimal leh pawl engemawzat atanga rawtna lo lut te enfel turin Mizoram Sorkar chuan he Review Committee hi dt.11.09.2024 khan a din a, an report hi kum khat chhunga thehlut tura tih a ni.

Chairman Pu Zahmingthanga Ralte chuan Mizoram Kohhran hrang hrang ten inneihna an buatsaihin he Dan hi an an hmang ngei a ni tihlan nan Inneih Certificate ah an tarlang ngei tur a ni, a ti a. He Dan tlawhchhan lova Inneih te chuan he Dan-in hamthatna hrang hrang a ken tel te chu an chang ve thei dawn lo a ni, a ti bawk. Chuvangin he Dan la hmang ve lo Kohhran an awm chuan hman vat a tul thu a sawi bawk. Hetih rual hian Kohhran hrang hrangin Inneih sawngbawl leh inkaihhruaina an neih te nekbuai lo zawnga he Dan hi siam a ni a, chu chu Sorkar duhdan reng a ni, a ti bawk.

He thutkhawmah hian Mizoram Kohhran Hruaitu aiawh te, Central YMA, MHIP, MUP leh Women Commission aiawh te bakah mi thiam sawm bik engemawzat an tel.