2726/2024-2025

Saitual, the 24th October, 2024: Vawiin chawhma dar 9:30 khan Election Commission of India ruahman angin Special Summary Revision of Electoral Rolls, 2025 (qualifying date- 01.01.2025) atan Saitual District huam chhunga Assembly Constituency pathum, 8-Chalfilh, 9-Tawi leh 21-Lengteng Draft Electoral Rolls chu DC Conference Room, Saitualah District Election Officer, District Bawrhsap ni bawk Dr. Lalngura Tlau kaihhruainain tlangzarh a ni.

He hunah hian Dr. Lalngura Tlau chuan kalkhawmte hnenah lawmthu a sawi a, Booth Level Officers (BLO) te thawhrimna zarah Draft Roll felfai tak an tlangzarh thei chu lawmawm a tih thu sawiin, BLO thar pariatte chu lawmin theih tawp chhuah turin a chah nghal a ni. Bawrhsap chuan ni 28th October 2024 atanga ni 29th November 2024 chhung hian inziaklut thar duhte, pem te leh paih ngai te tihfel a ngai a, hemi chungchanga inhrilhhriatna ‘SVEEP Special Awareness Campaign’ pawh kalpui a ni dawn tih sawiin, draft roll tlangzarhna leh sawizauna hun a hmang nghal bawk a ni.

Draft roll tlangzarh takin a tarlan danin polling station siamrem a nih hnu hian 8- Chalfilh-ah 34, 9-Tawi-ah 27 leh 21- Lengteng-ah 27 a awm a, a vaiin polling station 88 a awm a ni. Voters te hi he constituency pathumah hian 55,743 awmin 8- Chalfilhah 20,021, 9-Tawiah 17,138 leh 21- Lengtengah 18,593 te an awm a ni. Service Voters hi an vaiin mi 459 an awm bawk a ni.

He draft roll tlangzarhnaah hian DEO leh DC ni bawk Dr. Lalngura Tlau bakah ERO, AERO, BLO, Political party aiawhte, tlawmngai pawl aiawhte an tel a ni. Draft roll tlangzarh zawhah hian BLO tharte chu training pek nghal an ni.