Vawiin chhun khan Lunglei DC Conference Hall-ah Mizoram Public Works Department bultumin Environmental/ Social District Level Consultation meeting neih a ni a. Lunglei DC Pu K. Lalrohlua chuan he meeting hi a kaihruai a ni.

He meeting-ah hian Mizoram State Roads - II Regional Transport Connectivity Project (MSR-II RTCP) hnuaia kawng sial dan Final Alignment ngun taka thlirho a ni a, stakeholder te nen sawihona neih a ni. Kawng sial tur hian kawng hrang hrang ah a chheh vela thing leh mau, mihring leh nungcha tan nghawng tha lo a thlen theih avangin, pawikhawih thei zirchianna leh inven dan tur zirna neih a ni bawk.

Zawhna leh chhanna hun hman niin, stakeholder te zawhna hi Pu K. Laltlawmlova, Land Acquisition Coordinator, Pu B.Lalhmingsanga, EE (PIU) leh Pu R. Lalrinmawia, Sr. AE ten an chhang a. Lunglei District chhunga he project-in a paltlang khua Village Council, sawrkar official leh tlawmngaipawl aiawh te an tel a ni.

The Mizoram State Roads Project II (MSRP II) in a tum ber chu Mizoram chhim leh hmar inkalpawhna kawngpui awm sa te tihchangtlun a, siamthat leh tih len/zauh belh te a ni a. Hei hian Bangladesh leh Myanmar te nena inkalpawhna leh insumdawn tawnna tha a siam dawn a ni. Public Works Department (PWD) hnuaia Project Implementation Unit (PIU) chuan he project hi a enkawlin a kaihruai a ni.