3636/2022-2023
Lunglei the 20th February, 2023 - Vawiin chawhma dar 10:00 khan Convention Centre, Lungleiah Mizoram State Day, 2023 lawmna hun Dr K. Pachhunga, MLA hova neih a ni. State Day lawmnaah hian Lunglei District head of office-te, tlawmngai pawl hrang hrang aiawhte, media mite leh sawm bik dang mi thahnem tak an kalkhawm.

Dr K. Pachhunga chuan kalkhawmte Mizoram State Day chibai bukin remna leh muanna vawng nung zel tur leh kan State in hma a sawn zelna turin a chhunga cheng mitinte hi kan pawimawh vek a ni tiin Sawrkar mawhah chauh ngai lovin kan hmazawn theuhah mitinten tan kan lak a tul takzet a ni, a ti a. Sawrkar hnathawk kalkhawmte pawh thahnemngai taka ram leh hnam hmasawnna tura theihtawp chhuah chhunzawm zel tura chahin tlawmngai pawl, media leh political party te nena thawhhona tha tak chu chhawmnung zel turin a sawm a ni.

Lungleia State Day lawmna hun Lunglei DC Pi Ramdinliani, IAS kaihhruaiah hian Rev R. Lalnunzira, Associate General Secretary, BCM Hqrs in hunserh a hmang a. Pu Lalthanmawia, Asst Professor, Lunglei Government College chuan Powerpoint Presentation hmangin ‘Mizoram State lo pianchhuah dan leh hmasawnna’ tih thupui hmangin zirtirna hun a hmang a. Lunglei Additional DC Pu Donny Lalruatsanga chuan lawmthu sawina hun a hmang a ni.

State Day lawmna hi ropui leh hlimawm taka hman niin Lunglei zaithiam Esther Hnamte in National Anthem a sa a, K. Lalrammawii leh K. Hmingthantluanga te pawh zaiin program zawhah hian a lawmna thingpui ruai kil ho niin, hun tihtawp a ni.