3635/2022-2023

Kolasib dated 20th February 2023: Vawiin khan I&PR Conference Hall, Project Veng, Kolasibah Mizoram State Day 2023 pual a hun hman a ni a. Pu John LT Sanga, Deputy Commissioner chu khuallian niin Pu Lallawmawma, Addl. DC chuan hun a kaihruai a. Kolasib khawchhung sawrkar pisa hrang hranga thawktute, tlawmngai pawl leh khawtlang hruaitute he hunah hian an tel a ni.


Deputy Commissioner Pu John LT Sanga chuan Mizoram chu India ram chhunga State dangte ang bawk a Constitution of India hnuai a chanvo nei a nih thu sawiin heng chanvo nei tur a ram pasalțha inpeknate, an huaisenna leh an tawrhnate hi țhangtharten an hriat thar a, zahna lantir nachang an hriat a țul thu a sawi a. State Day pual a hun hmanna chuan țhalaite thinlungah ram leh hnam hmangaihna nasa zawk a pian tir a beisei thu leh chu chuan hnam anga hmasawnna nasa zawk a thlen phah ngei a beisei thu a sawi bawk a ni.


Pu John LT Sanga chuan khawvel ram hrang hrang a State thar sualchhuak tura a chhunga chengte inpekna leh tawrh nasat zia tarlangin State anga zalenna thui tak neih hlut zia kan hriat thar a pawimawh thu a sawi a. Mizo anga kan ram tia kan koh theih awmchhun chu Mizoram state chiah hi a nih angin a ram chhung a chengte inkar a inunauna tha te, zalenna leh ralmuanna te, inlungrualna leh zo nun ze mawi tlawmngaihna te kan chawisan rualin a leilung hausakna humhalh kawngah pawh tan la thar zel turin kalkhawmte a chah bawk a ni.


Pu Hmingthanzuala, DIPRO, Kolasib buatsaih a State puitling dinhmun luah tur a Mizo National Front hmalakna te, khaw hal, khaw khawm leh țam avanga mizo mipui tawrhna leh tun dinhmun thleng tur a inbiakna neih a nih dan tarlanna Video clip thlirho a ni a. Pu Ralliantawna, Vice Chairman, All NGO Coordination Committee chuan zalenna hlut zia leh hmasawnna chak zawk thleng tur chuan ram leh hnam hmangaihna thinlung put a pawimawh zia a sawi a. Pu C.Lalzarliana, Sr. EE, P&E chuan kalkhawmte lawmna thu sawiin Pu R.Lalnghakliana, Project Director, DRDO chuan lawmthu sawina hun a hmang bawk a ni.

Attachment

  • Loading attachment...