3634/2022-2023
Dated Serchhip, the 20th February, 2023: Vawiin khan Serchhip DC Conference Hall ah Mizoramin State a hmuh champha vawi 36 na urhsun taka hman a ni a. Pi Nazuk Kumar, Bawrhsap chu khuallian a ni.

Pi Nazuk Kumar chuan, he ram mawi tak leh a chhunga cheng hnamte ziarang, culture, rimawi leh pipute thil hlui duhawm tak tak te hi vawng nung zel ang u tiin kal khawmte a sawm a. Mizoramin state a nih theihna tura sul lo sutu hruaitu hmasate hrerengin kawng tinrengah mitin thleng phak hmasawnna a lo awm zel theih nan thukhat vuain i thawk ho zel ang u, a ti bawk.

Inkhawm hi Pu K. Saitluanga, Deputy Director, I&PR in a kaihruaia, chairman hian Mizoramin State nihna a hmuh thlenga a lo inrelbawl tawhna chanchin tlangpui sawina a neih bakah President of India leh Prime Minister of India ten Mizoram mipuite hnena State Day puala tweeter a an thuziak tawi chhiarchhuahna a nei bawk. Rev Rolungmuana Zadeng, Counsellor, FG& CC, Serchhipin hunserh a hmang a, Sub Headquarters YMA zaipawlten "Aw Zoram nuam" tih hla mawi taka an rem bakah anni kaihhruai hian kalkhawmten "Ro min rel sak ang che" tih hla an sa ho bawk.

Kumina Mizoram State Day Serchhipa lawmnaah hian Head of Offices te, tlawmngaipawl hrang hrang YMA, MUP leh MHIP aiawhte, Joint VC aiawhte, chanchinbumite leh sawm bik mi pawimawhte an tel a ni.