3633/2022-2023
Mamit 20th February, 2023 : Ramchhung hmundangte rualin Mizoram State Day, 2023 chu DC Conference Hall, Mamit-ah hman niin, Pu Lalnunhlua, District Bawrhsap chuan khuallian niin he hun hi a hmanpui.

District Bawrhsap chuan kum 36 chhung State puitlinga hlankai kan nih hnuah pawh kan District chu India rama District hnufual kan la ni chu kan politician te chauh mawhphurhtu an ni lova, kan zavaia neitu rilru pu-a tan kan lak a ngai a, kan ko a mawhphurhna te tling leh tha taka kan hlen a nih chuan hma kan sawn ngei a beisei thu sawiin, kan hlawh leh kan hnathawh a inmil em tih chu kan inzawh fo a ngai a. A bikin Sawrkar-a ka thawhpuite kan District chawikan naah mawhphurtu kan nih angin rilru leh ngaihtuahna thar pu a, kan hma zawn tih tur awm a piangte phur tak leh thatho taka ti zel turin a sawm.

Khuallian chuan District chhung mipui zawng zawngte chu khua leh tui tha tak ni tur leh ram hmasawnna tura theihtawp chhuaha, kan hma zawna kan mawhphurhna theuhte hlen zel turin a chah a ni.

Pu Vanlalchhuanga Chhangte, President Sub Hqrs YMA pawhin thu sawiin Mizoramin State puitling kan neih theihna tura nunna hlante zahna chibai bukin, kum 36 chhung keimahni-a inrelbawlna kan neih hnuah ram intodelh lo kan la ni reng a nih chuan kan inenlet a tul thu leh theihtawp chhuaha ram tana kan ngaihtuahna hlan thar theuh turin kalkhawmte a sawm bawk a ni.

He huna kalkhawm ten State Anthem, Ro min rel sak ang che tih sakhona neih a ni a. Pi Sapliannguri, Superintendent, DC Office chuan a kaihruai bawk a ni.

Mizoram State Day 2023 -ah hian Mamit khawpui chhunga Heads of Offices, Tlawmngaipawl hrang hrangte leh thuthar thehdarhtute an tel a ni.