1093/2025-2026

Lunglei, 2025 Vawkhniahzawn thla ni 8: Vawiin khan Lunglei District Water & Sanitation Mission (DWSM) chu Additional Deputy Commissioner Pi Zoramdini hovin Lunglei DC Conference Hall-ah an ṭhu khawm a. Ministry of Health & Family Welfare hnuaia India ram pum huapa kawṭhalo (diarrhoea) vanga naupang thihna a thlen lohna tura ni 45 (June 16 - July 31, 2025) chhung beihpui thlak, STOP Diarrhoea Campaign 2025 kalpui meka a kaihhnawih department hrang hrangte hma lakna leh hmachhawpte an thlir ho.

Chairman Pi Zoramdini chuan "Kawṭhalo ven nan faina leh ORS a pawimawh" tih thupui hmanga beihpui thlak mek chu a hlawhtlin theih nan leh Lunglei District chhungah naupang kawṭhalo vei leh kawṭhalo vanga thi an awm lohna turin department hrang hrangte thawh hona a pawimawh tih sawiin, hriselna chu faina leh thianghlimna te, tui thianghlim leh hnianghnar te, ei tur ṭha leh hrisel te nen inkungkaih tlat a nih avangin department hrang leh mipuite ṭan rualna leh thawh hona aṭang chauhva hlen chhuah theih a ni, a ti.

Lunglei DWSM Member Secretary, PHED Lunglei Rural WATSAN Division-a Sr Executive Engineer Dr ZR Ṭhasangzuala chuan STOP Diarrhoea Campaign 2025 chhunga DWSM hnuaia hma lakna tur ruahmante bawhzui a nih dan tar langin, hmachhawp la awmte a sawi zau bawk a. Department hrang hrang ai awhte'n STOP Diarrhoea Campaign kaihhnawiha an hma laknate tar lang bawkin, he campaign hlawhtlinna atana hma lakna tur leh thawh hona tur hrang hrangte sawi ho zui a ni.

STOP Diarrhoea Campaign 2025 kalpui chhunga Drinking Water & Sanitation hnuaia hma lakna tur ruahman zingah DWSM ṭhut khawm buatsaih tura tih a nih angin vawiin ṭhut khawm hi buatsaih a ni a. PHED report aṭanga a lan danin, Lunglei District-a thingtlang khaw 101 awmah in tinah tui thianghlim herh haw mai theih (functional household tap connection) pek vek tawh niin, Lunglei District chhunga zirna in 359-ah leh anganwadi centre (AWC) 238-ah JJM kal tlangin tui thianghlim herh haw mai theihna, tap water connection pek a ni tawh bawk.

Lunglei District Laboratory leh sub-laboratory-ahte khaw hrang hranga tui lakte natna hrik leh damdawi hlauhawm laka a thianghlim leh thianghlim loh kum tin ṭum 2/3 endik ṭhin niin, STOP Diarrhoea Campaign kalpui chhung hian sikul, AWC, damdawi in leh vantlang hmunahte an tui lak a thianghlim leh thianghlim loh chu PHED lamin an endiksak mek bawk a. Tui renchem, ruah tui khawl, tui hna siam nana ramngaw humhalh leh faina leh thianghlimna leh hriselna kaihhnawihah te vantlang zingah inzirtirna hrang hrang buatsaih ṭhin a ni bawk a. He'ng hma lakna hrang hrang hi la kalpui chhunzawm zel tur a ni.

STOP Diarrhoea Campaign hi kawṭhalo vanga naupang kum 5 hnuai lam thihna a thlen lohna tura beihpui thlakna niin, kawṭhalo ven beihpui thlak chhung hian H&FW, WCD, Education leh line department hrang hrang ṭang hovin Lunglei District chhunga anganwadi centre, sikul leh damdawi in hrang hrangahte ORS & Zinc Corner siamin damdawi (ORS & Zinc) sem mek a ni a. Hei bakah hian kawṭhalo ven dan leh enkawl dan te, tui thianghlim in leh hman pawimawhna te, kut sil fai pawimawhna leh kut sil fai dan te, faina leh thianghlimna chungchanga naupangte leh anmahni enkawltute tana hriat tur pawimawh hrang hrang inzirtirna te buatsaih ṭhin a ni bawk.

Kumina STOP Diarrhoea Campaign kalpui chhung hian H&FW department aṭangin Lunglei leh Hnahthial district-a naupang kum 5 hnuai lam 14,962 tinzawna hma lakna tur ruahman niin, ORS bawm (packet) 2 zel leh Zinc tablet mum 14 zel sem tura ruahman leh sem mek a ni.