1092/2025-2026 

Aizawl, Vawkhniahzawn thla Ni 8, 2025: Vawiin khan Mizoram Youth Commission, Honda India Foundation leh Visan Foundation-te tangkawpin an buatsaih Project Buniyaad Hotel Management (Food & Beverages) Training Course, Phase-II hawnna hun chu Mizoram Youth Commission (MYC) Auditoriumah hman a ni a. Labour, Employment, Skill Development & Entrepreneurship Minister Pu Lalnghinglova Hmar  chuan khuallian niin hun a hmanpui. 

Khuallian chuan thu sawiin Honda India Foundation leh Visan Foundation te nena thawh hona tha an nei chu lawmawm a tih thu a sawi a. Khawvel thang zelah hospitality sector than chakzia sawiin – hotel management te, nursing leh caregiving ahte mihring mamawhna a sang chak hle a; hengahte hian Mizo thalaite ten theihna sang tak kan neiin hnathawhna tur kawng zau tak a inhawng a ni a ti. Mizoram hmasawnna sawiin Japan ramah Nurse 15 thawn chhuah an nih tawh thu te, thawn chhuah leh mai theih tur, Japanese tawng zirlai mi 78 an awm mek thute a sawi a, Ram dangah Mizo thalaite, rintlak leh awmze nei zawka tam lehzual an thawh chhuah thei nan, Ministry of External Affairs, Government of India hnenah LESDE Department chuan Recruiting Agency ni tura dilna a kalpui mek thu leh a hlawhtlin thuai a beisei thu a sawi bawk. 

Project Buniyaad Training programme hi thla hnih chhung awh programme niin MYC Coaching Centre-ah zirna kalpui thin a ni a. Phase-I hi September 2024 - March 2025 khan kalpui niin Pu Lalduhoma, Chief Minister chuan a lo hawng tawh a. Aizawl leh Lunglei MYC Centre-ah te training neih niin mizo thalai 122 ten training an zo va, an  zinga mi 97 te chu India ram Hotel changtlung tak takahte hna thawkin an awm tawh a ni. Vawiin Phase-II hawnnaah hian Honda India Foundation chuan CSR kaltlangin MYC Coaching Centre-a hman tur Smart TV pathum (75 inch) an hlan nghal a ni. 

Training hawnna hunah hian Vishnu Dixit, Chief Manager, Honda India Foundation bakah Visan Foundationa mite, MYC official-te leh zirlaite an tel a ni.