2139/2024-2025

2024 Mimkut thla ni 20: India ram puma chawlhkar hnih chhung awh tur faina beihpui thlak, Swachhata Hi Seva 2024 kalpui mekah vawiin khan Urban Development & Poverty Alleviation (UD&PA) Department, Lunglei huaihawtin Convention Centre, Lungleiah UD&PA hnuaia self help group (SHG)-te thil siam chhuah pho chhuahna, "Swachh Bharat Mission One Day Cultural Fest" buatsaih a ni.

He huna Khuallian Lunglei Additional Deputy Commissioner Pu James Miahlung chuan kum 2014 aṭangin Swachh Bharat Mission hnuaiah faina kawngah ngawrh takin hma lakna kalpui a nih thu sawiin, he hma lakna hi khua leh tui zawng zawng thawh hona tur a nih angin mi tinin a hlawhtlin nan mawh kan phur ṭheuh a ni, a ti a. Faina chu hriselna nen inkungkaih tlat a nih avangin district fai leh hrisel ni turin a paihna hmun ni lova bawlhhlawh paih ching lo tur te, bawlhhlawh thehthang dana fimkhur tur leh faina kawnga hma laknaah district dang tana entawn tlak nih tum tur te'n district mipuite a chah a. SHG-te'n cultural fest-a an thil siam chhuah an pho chhuak thei chu lawmawm a tih thu sawiin, SHG chu ei zawnna mumal nei lote ei zawnna siamsaktu leh mi retheite khai chhuahna atana sawrkarin a ruahman a nih angin Lunglei District-a SHG 1,200 chuang awmte'n tih tak taka hma an lak chuan khua leh tui tam takin din chhuah nan an hmang thei dawn a, SHG chu a hlu hle a ni, a ti. 

He hun hi Lunglei District Urban Development Officer (DUDO) Pu C. Sawihlira'n kaihruaiin, Swachhata Hi Seva chu Swachh Bharat Mission hma lakna peng khat atana kum 2018 aṭanga kum tin kalpui a nih thu leh faina leh thianghlimna kawnga mipuiin rilru kan pek a, kan pen chhuah a, kan fai lehzualna atana hma lakna pawimawh tak a nih thu a sawi a. UD&PA Lungleia Inspector of Sanitation Pi F. Lalruatkimi'n report pein, Swachhata Hi Seva 2024 kal meka hma lak tawhna leh hmachhawpte a tar lang a ni. 

He hunah hian PHED-a Sr EE, SDO leh thawktu dangte, DLAO, DIPRO, UD&PA-a thawktute leh self help group member-te an tel a. Khuallian Pu James Miahlung chuan ribbon chep chatin, he cultural fest hi a hawng a, inphona dawhkan (stall) hrang hrang a fang kual nghal a ni. 

Vawiina SBM Cultural Fest buatsaihah hian stall 18 awmin, UD&PA hnuaia SHG 15 leh mimal 3 te'n an thil siam chhuah leh thlai thar chhuah chi hrang hrang chu mipuiin an en tur leh an lei theih turin an pho chhuak a. Thlai leh thei tharlam tak tak te, thlai leh thei aṭanga ei tur chi hrang hrang siam chhuah te, chhang, sahbawn, puan leh hnang aṭanga siam in chhung bungrua leh hmanrua te, bawlhhlawh thehthang mai mai tur aṭanga thil mawi leh hlu, hman tlak siam chhuah (waste to art) leh thil chi hrang hrang pho chhuah a ni a. Thil pho chhuah leh hralh bakah hian, mipuite hnena faina leh thianghlimna kawng inzirtirna leh inkawhhmuhna kalpui nghal a ni bawk.