1595/2025-2026

Lunglei, 2025 Mimkut thla ni 25: India ram puma faina beihpui thlak, 'Swachhata Hi Seva 2025' kalpui mek leh Lunglei Municipal Council (LMC) hnuaia bawlhhlawh awm lohna khawpui siam tura hma lakna, 'Garbage Free City Lunglei Project 2025' leh chaw ṭha pawimawhzia inzirtirna, 'Rashtriya Poshan Maah 2025' kalpui mek hnuaiah vawiin khan Lunglei khawpui chhungah 'Faina Hnatlangpui' buatsaih a ni a. Khawpui chhung hmun hrang hrang then fai a nih bakah, sawrkar pisa, zirna in leh anganwadi centre-te tihfai a ni a, khua leh tuite'n faina kawnga thawk turin thu an tiam bawk.

Vawiin hi Swachhata Hi Seva hnuaia "Ek Din, Ek Ghanta, Ek Saath: Nationwide Voluntary Shramdhaan" tih thupui hmanga India ram puma faina hnatlang thawh ni tura ruahman sa niin, LMC Garbage Free City Project hnuaia hnatlangpui thawh ni atan ruahman a ni bawk a. He'ngte leh Rashtriya Poshan Maah hman mekah hman khat daih sarang (single use plastic) ṭhat lohzia leh bawlhhlawh thliar hran (waste segregation) pawimawhzia inzirtirna hun hman tura ruahman te nen kai kawpin, Lunglei khawpui chhunga Faina Hnatlangpui hi buatsaih a ni.

Chawhma dar 10:30-a Lunglei Venglaia Old Tennis Court-a Faina Hnatlangpui (Mass Sanitation Drive) hawnna hun hmanah LMC Chairman Pu Lalzuithanga chuan Hnatlangpui khuhhawnna thu sawiin, Lunglei chu municipal khawpui, mahni thawh chhuaha hma sawn leh indawm kang tur a nih angin theih tawp chhuah a ngaih thu a sawi a. LMC-in khawpui hma sawnna atan kawng hrang hranga hma a lak thu sawiin, faina kawngah pawh theih tawpa hma lak a nih thu leh Lunglei khawpui chu bawlhhlawh awm lohnaa siam turin, Garbage Free City Project kalpui mek a nih thu a sawi a. Fai chu hriselna leh changkanna a nih thu leh khawpui mawi leh nuam siam turin fai a pawimawh thu sawiin, chumi atan chuan mipuite thawh hona leh ṭan rualna a pawimawh thu a sawi a. Mahni awmna hmun ṭheuhvah fai tuma hma la turin Lunglei mipuite a sawm.

LMC Ward No. VI Councillor Pu R. Lalremsiama'n hun a kaihruai a. Lunglei Additional Deputy Commissioner Pi Zoramdini chuan Hnatlangpui buatsaih chhan sawiin, hma lakna lian leh pawimawh tak tak pathum - Swachhata Hi Seva, Garbage Free City Lunglei Project leh Rashtriya Poshan Maah te kal tlangin DC Office, LMC, Urban Development & Poverty Alleviation (UD&PA) leh Women & Child Development te bul tuma buatsaih a nih thu a sawi a. Swachhata Hi Seva chuan khawtlang ṭang ruala faina hna thawh chu a tum ber a nih angin pawl hrang hrangte'n faina hnatlang an thawk dawn tih sawiin, hnatlan mai duh tawk lo va, mahni in lamah ṭheuh pawh faina hna thawh chhunzawm turin mipuite a chah.

Lunglei Sub-Headquarters Young Mizo Association (YMA) President Pu K. Lalfakzuala leh Lunglei Sub-Headquarters Mizo Hmeichhe Insuihkhawm Pawl (MHIP) President Dr H. Lalnunmawii te pawhin thu sawiin, faina chu a taka nunpui a, khawpui fai siam tura theih tawp chhuah ṭheuh turin mipuite an sawm a. Mipui kal khawmte chuan faina kawnga hma la turin "Faina Thutiam" an chham rual bawk.

Lungleia Faina Hnatlangpui buatsaihah hian LMC Chairman, councillor-te leh official-te, WCD-a thawktute, LMC sanitation worker-te, Sub-Headquarters YMA leh MHIP te, Clean Lunglei leh Project Save Tlawng te, zirna in hrang hrang (Lunglei Government College, Govt J. Buana College, HATIM, Govt HSS Lunglei, Sacred Heart School leh Southern Flower School)-a NSS (National Service Scheme), Rovers & Rangers leh Scouts & Guides te chuan Lunglei khawpui chhung hmun hrang hrangah chanpual insemin, khawpui chhung then fai hna an thawk a ni.

September ni 17 aṭanga October ni 2, 2025 inkar chhunga Swachhata Hi Seva 2025 kalpui mekah hian UD&PA hma laknain Lunglei khawpui chhunga bawlhhlawh then fai tur hmun bik, Cleanliness Target Unit (CTU) thlan chhuah hmun panga chu then fai hna thawh tawh a ni a. Civil Hospital Lungleia Health ATM-ah LMC hnuaia faina kawnga thawktu (sanitation worker)-te hriselna dinhmun endiksak tawh niin, sawrkar pisa, zirna in leh anganwadi centre hrang hrangah leh District chhung khaw hrang hrangah faina hnatlang thawh chhoh mek a ni bawk.