1594/2025-2026

Dated Aizawl, the 25th September, 2025: Vawiin khan MLA Lt. Col. Clement Lalhmingthanga hovin Secretariat Conference Hall-II, MINECO-ah Mizo Territorial Army chungchangah meeting neih a ni.

He hunah hian Aizawl Territory Army (TA) Company awm lailawkna tur, Bung Banglaa Institute of Hotel Management hmun thawmthat hna kal mek dan te, Territorial Army lak dan tur kalhmang te leh Territorial Army Company thar din dan tur te sawiho a ni a.

Public Works Department (PWD) aiawh atangin Bung Banglaa TA awm lailawkna tur hmuna building pathum - Main Building/Administration Building, Girls Hostel leh Restaurant Building-a thawmthat hna thawh zawh tawhte leh hna thenkhat khaihlak chhante ngaihthlak a ni a. Public Health Engineering (PHE) Department leh Power & Electricity (P&E) Department aiawhte pawhin an hmalak tawhnate leh an la hmabakte an sawi bawk a. Heng department-te hian Finance Department leh Home Department aiawhte hnenah sum dinhmun leh an sum mamawhnate an thlen nghal bawk a ni.

Territorial Army, Aizawl Company Officer-in-charge Lt. Col. Goldi Bora atangin TA awm lailawkna hmun tur tihchangtlun nana la mamawhte leh hna lak kalpui dan turte ngaihthlak a ni a. 23 Sector Assam Rifles DIG Brig. Pushpendar Sorayan pawh he hunah hian telin, Mizoramin ram dang a thenawm avang leh TA chu ram venhim hna pawimawh thawktu a nih dawn avangin hna laka fimkhur a pawimawh thu a sawi a ni.

Mizo Territorial Army, Aizawl Company hnuaiah hian mi 150 lak tur niin, November vel atanga hna lak kalpui tan tum a ni a. Vawiin thutkhawmnaah hian Home Department, General Administrative Department, Land Revenue & Settlement Department, Planning & Programme Implementation Department, Public Works Department, Finance Department, Sainik Welfare & Resettlement Department, Information & Public Relations Department, Mizoram Youth Commission, Public Health Engineering Department, Power & Electricity Department leh State Intelligence Bureau aiawhte an tel a ni.