Vawiin chawhma dar 11:00 khan DC Conference Hall-ah Lunglei District Additional DC Pu John Tanpuia, MCS hovin Lungleia kumin Zirtirtute Ni hman dan tur ngaihtuah a ni.
Meeting chuan kumin September ni 5-a Teachers Day Lunglei District-a lawmna programme ropui taka neih anih theih nan ruahmanna fel tak siam ni se, a ti a. Teachers Day lawmna programme hi a huhova hman nilovin mahni school theuhah hman ni se, tih a ni a. Lunglei District chhunga Teachers Day lawmna hunah hian State Level Committee-in ruahmanna a siam ‘General Guidelines for Celebration of Teachers’ Day 2017’ chu school tinin zawm ngei se, a ti bawk a. Teachers Day lawmna pual hian Lunglei khawpui chhungah banner 5 tarchhuah ni se tih meeting chuan a rel a. Zirtirtu te Welfare Fund atan sawrkar leh private school zirtirtu zawng zawng ten Rs. 50/- theuh an thawh dawn bakah zirlai te pawh bituk zat awm lovin an remchan anga thawh ve tura ngen ni se, tih a ni bawk.
He meeting-ah hian Lunglei District chhunga sikul lama mawhphurtute bakah Zirtirtu Association hrang hrang leh tlawmngai pawl aiawhte an tel a ni. Kumin Teachers Day 2017 Sub-Division-a hman dan tur rel turin Sub Divisional Level Meeting August-ah hian neih a ni dawn bawk a ni.
