Vawiin chawhma khan Govt.T.Romana College chuan Freshers’ Social leh Graduation Day Vanapa Hall-ah an hmang a, Home Minister Pu R.Lalzirliana chu Khuallian a ni.

Pu R. Lalzirliana chuan “Nu leh pa thuawih hi hlawhtlinna bul a ni” tiin zirlaite chu a fuih a. Hetiang function buatsaih a ni chu lawmawm a tih thu sawiin, lawmte lawmpui hi kan tih tur reng a ni, a ti a. Home Minister chuan zirlaite chu mahni inthunun leh mi puitling nih pawimawhzia a hrilh a. Mizo thalaite ram pawn hmun hrang hrangah hna hmu in an chhuak tawh a, heng zinga hlawtlingte chu mi chhelte an ni, a ti a. Hnam humhalh kawngah zirlaite hmalakna chu lawmawm tiin graduate level maia duhtawk lo turin a chah a. Central service lamah pawh mizo thalaite tan lak a ngaih thu sawiin hemi kawnga hlawhtlinna chuan kan ram dinhmun  a chawikan  theih thu a sawi a. Hlawhtling tur chuan hrehawm hmasak  a ngai a ni, tiin zirlaite chu an hun awl neihte hmang tangkaia thawkrim turin a chah a. Zirlai kalchhuak turte pawh an kal zelna turah duhsakna a hlan nghal bawk a ni.

Govt.T.Romama College (GTRC) hi 1992 khan din niin tun dinhmunah hian zirlai 936 an awm a. Department hrang hrang pariat (8) awmin Teaching Staff sawmthum panga (35) leh Non-Teaching Staff sawm pakua (19) an awm mek a ni. MZU hnuaia UG exam 2017 ah khan an pass percentage chu 67.36 a ni. 

He hunah hian Home Minister chuan Govt.T.Romama College Annual Magazine “Raltiang” chu a tlangzarh a. Zirlai tithate chawimawina neih niin award hrang hrangte chu zirlaite hnenah chuan a hlan nghal bawk a.  Zirlai Graduate-te thlahna hun hman niin Govt.T.Romama College Principal Dr. Lalrintluanga chuan fuihna thu a sawi bawk a ni.