PHE Department chuan an hnathawh thlirletna leh hmachhawp sawihona hun  nihnih awh tur vawiin khan I&PR Auditorium ah an tan a. Review meeting hawnna inkhawm hi PHE Minister Pu Zodintluanga leh Parliamentary Secretary Pu Hmingdailova Khiangte ten an hmanpui a ni.

PHE Minister Pu Zodintluanga chuan PHE Department-in mipui vantlang tana hna thawhna kawnga intuaitharna leh infuihtharna hun atan Review Meeting neih ani chu lawmawm a tih thu a sawi a. World Bank-in a tarlan danin India rama natna inkaichhawn theih 21% chu tui thianghlimlo leh faina kawnga hnufual vang anih thu sawiin tui thianghlim leh faina (sanitation) hi inzawm tlat hriselna atana pawimawh tak anih avangin PHE Department chuan mipuite hmasawnna atan hna pawimawh tak an thawk a ni, a ti a.  Pu Zodintluanga chuan India ramah 70% dawnin tui thianghlim in tur an neih loh laiin Mizoramah chuan National Rural Drinking Water Programme (NRDWP), Central Scheme, State Fund hmangin khawpui leh thingtlang khaw hrang hrangah tui thianghlim pek hna PHE Department chuan a thawh mek thu a sawi a. PHE Minister chuan AMRUT Scheme hnuaiah Aizawl khawpui chhunga pipe hlui thlak hna thawh mek anih thu leh SIPMIU-in water supply tih changtlunna tur Asian Development Bank loan hmangin hna a thawh mek thu sawiin sawrkarin Aizawl khawpuiah leh district headquarters dangah pawh tui alo hnianghnar zawka tui harsatna sutkian anih theihnan theihtawp a chhuah  a ni, a ti.

Pu Zodintluanga chuan PHE Department in hmachhawp tam tak an neih thu sawiin Aizawl khawpui leh khawpui lian deuhahte kartin tui thianglim tak sem thei tura tan la turin a fuih a. Mipui tana hnathawk kan ni tih hre reng chunga theihtawp chhuaha department dang nen te pawh tangruala tha taka thawhho zel tur a ni, a ti a.  Khawvel thang zel in a tlansan nilova mipuite rawng tha taka bawl thei turin nitin mahni inzir chhova thiamna(technology) tharte hmang tangkai zel turin Pu Zodintluanga chuan PHE hotute chu a chah bawk a ni. 

Parliamentary Secretary Pu Hmingdailova Khiangte pawhin thu sawiin PHE Department in Mizoram chhungah Swachh Bharat Mission chak taka a kalpui mek chu lawmawm a tih thu leh sawrkar laipuiin  ruahmanna a siam angin 2019-ah chuan Mizoram pumpui Open Defecation Free a puan theih anih ngei a rin thu a sawi a. Tui semtu leh meter reader atanga a lal ber thengin rinawm taka hnathawh a pawimawh thu leh Department hmel tilangtu leh tihmingthatu annih theih thu sawiin theihtawp chhuaha an zavaia Mizoram mipui tana thawk zel turin a fuih a ni.

PHE Review meeting hawnna inkhawm hi PHED Secretary Pu V Lalremthanga’n a kaihruai a,  mipuiten PHE Department hmalakna te an hmuh theihna tur leh anmahni hnathawh thlirletna tura buatsaih SBM (Swachh Bharat Mission) documentary film chu PHE Minister Pu Zodintluanga chuan  a tlangzarh a. Aizawl District, Kolasib District leh Champhai District hnenah Open Defecation Free Certificate PHE Minister chuan a hlan nghal bawk a. Er. Lalmuanzova E-in-C PHED chuan lawmthu sawina in review meeting inaugural function hi a khar a ni.

PHE Review meeting ah hian chawhnu lamah technical session neiin hnathawh dan thlirletna leh  hmachhawp sawiho nan hun an hmang a. Naktukah nilengin technical session leh sawihona hun Aijal Club-ah hman chhunzawm leh ani ang.