538/2026-2027

Lunglei, 2026 Ṭomir thla ni 14: Startup India, Department for Promotion of Industry and Internal Trade (DPIIT), Ministry of Commerce & Industry, Government of India te, Mizoram Startup Mission (MSUM), Planning & Programme Implementation Department, Government of Mizoram leh Lunglei Deputy Commissioner te ṭang ho huaihawtin TEJAS (Transforming Entrepreneurial Journeys Across States & Districts) District Awareness Programme chu vawiin khan Lunglei Convention Centre Hall-ah hlawhtling taka buatsaih niin, sumdawnna kalpui mek leh bul ṭan tum te, he lama tui mi leh zirlai mi 130 chuang an tel.

He hun hi Lunglei District Bawrhsap Pi Navneet Mann chuan Khuallian niin a hmanpui a. TEJAS chu khawpui tenau zawk leh thingtlanga chengte tana sumdawnna bul ṭanna kawnga puitu ruahmanna ṭha tak a nih thu sawiin, ṭhalaite leh a tui mite tana ṭanpuina leh kaihhruaina ṭha tak awm chu District ṭhalaite'n chhawr ṭangkai se a duh thu a sawi a. Sumdawnna kawnga bul ṭan nan Lunglei District-ah hma lak theihna tam tak a awm thu sawiin, damdawi hmang lova thlai chin te, mau hmanga thil siam chhuah te, balhla chin leh sawngbawl te, ei tur chi hrang hrang sawngbawl kawngah te hma lak theihna tam tak a awm thu a sawi a. Mipuite pawhin chu lam atan chuan thiamna leh theihna an neih ṭhat thu sawiin, kaihhruaina ṭha an dawn chuan sang tak thleng thei tur leh hlawhtling thei tur tam tak an lo chhuah a beisei thu a sawi a. He lam kawnga sawrkarin hma lakna hrang hrang a neihte chu chhawr ṭangkai tum turin ṭhalaite leh a tui mite a chah.

He hun hi Pi Carolyn Lalduhawmi'n kaihruaiin, inlawmna thu a sawi a. MSUM aṭangin Pi Ruth Chuauthangpuii chuan TEJAS chungchang leh Mizorama kalpui a nih dan a sawi fiah a. Pi Vanlalparmawii (MSUM) chuan Startup India leh TEJAS hnuaia hamṭhatna awmte leh hma lak dan tur hrang hrang a zirtir a. Pu Samuel Vanremruata (MSUM) chuan Mizorama sumdawnna bul ṭan tharte dinhmun leh sawrkar hma lakna pawimawhna te a tar lang bawk.

Chawhnu lamah Commerce & Industries Department hnuaia RAMP State Lead Pu Mark Lalduhsaka chuan sumdawnna kalpui kawnga Supply Chain Management pawimawhna leh One District One Product (ODOP) leh MadebyMIZO chungchang a zirtir a. GST Expert Pu Lalremsanga chuan bungrua leh sum che vel chhinchhiah dan te, GST chhiah leh sum enkawl chungchang te a zirtir a. Pu Lalngaihawma (MSUM) chuan Mizoram BanaKaih Venture Capital Fund chungchang leh a dil theih dan te a sawi fiah a. Lunglei SDC Pu Lalruatfela'n lawm thu sawiin hun a khar.

TEJAS initiative hi India ram chhunga district thlan bikahte kalpui niin, khawpui tenau leh thingtlang hmun kilkhawr zawka mite'n sumdawnna bul ṭan dan kawng leh sawrkar aṭanga ruahmanna leh ṭanpuina awm theite an hriat a, an chhawr ṭangkai theihna tura inzirtirna, inkaihhruaina leh kawng inkawhhmuhna atana ruahman a ni.