Vawiin chawhnu khan District Legal Service Authority, Lunglei District buatsaihin YMA, Sub Headquarter Conference Hall, Lunglei ah the Mizoram Victim Of Crime Compensation Scheme 2011 hnuai ah midang kut tuar avanga nunna chan mi pahnih leh scooty in a sut hlum mi pakhat chhungte hnen ah zangnadawmna cheng nuai 20 pekna hun hman a ni.

Zangnadawmna pekna inkhawm hi Pu R.Thanga, District Session Judge leh Chairman, District Legal Service Authority, Lunglei District ni bawk in a kaihruai a. Pi Julie Lalrinzami, Chief Judicial Magistrate leh Secretary, District Legal Service Authority, Lunglei District chuan report pe in, The Mizoram Victim Of Crime Compensation Scheme 2016 (Amentment) in midang kut tuar avanga boralna thleng te, pawngsual tawkte leh khuarel  chhiat tawk a vanduaina an awm in Sawrkar in zangnadawmna sum fai in a pe thin a ni, a ti. Zangnadawmna hi District tin a District Legal Service Authority hnenah dilna siam tur a ni a, District Legal Service Committee ten uluk taka an lo ngaihtuah hnu ah thutlukna te siam in Mizoram State Legal Service Authority ah an thehlut leh anga, Mizoram State legal Service Authority hian Mizoram Sawrkar ah a thehlut ve leh thin a ni a ti.

Vawiin a zangnadawmna pek te chu Pi Lalthanzami M/o R.Lalmalsawma(L) Electric Veng, Lunglei hnenah cheng nuai 8, Pi Lalbeiseii M/o C.Lalhmangaihsanga(L) Electric Veng, Lunglei hnen ah cheng nuai 8 leh K.Lalrammawia S/o K.Lalmuankimi(L), Chanmari, Lunglei hnen ah cheng nuai 4 te an ni.